Буюк Британияда 15 февралдан бошлаб COVID-19 хавфи юқори бўлган давлатлардан ташриф буюрувчилар учун икки ҳафталик мажбурий карантин жорий этилади. Бу ҳақда BBC маълумотига таяниб «Коммерсантъ» хабар берди.
Ҳозирда мамлакатга фақат Британия фуқаролари ёки унда яшаш ҳуқуқига эга бўлганлар кириши мумкин. «Қора рўйхат»даги мамлакатлардан қайтган фуқаролар ўн кунни «COVID-меҳмонхоналар»да ўтказиши керак. Ушбу меҳмонхоналарни мамлакат аэропортлари яқинида ташкил этиш режалаштирилган.
BBC маълумотига кўра, бундай меҳмонхоналарда ҳар куни, тахминан, 1000 киши истиқомат қилади ва унда яшаш нархи бир кеча учун 80 фунтни ташкил қилади.
Ҳозирда оғир эпидемиологик вазиятни бошдан кечираётган мамлакатларнинг «қора рўйхат»ига 33 та давлат киритилган. Уларнинг аксариятида коронавируснинг янги штаммлари аниқланган.
Айни пайтда Буюк Британияда пандемия бошланганидан буён учинчи бор локдаун жорий этилган. Мамлакатда деярли 4 миллион кишида касаллик қайд этилган. Вирус қурбонлари сони 110 мингдан ошган. Буюк Британия COVID-19’га қарши эмланганлар сонининг кўплиги бўйича дунёда учинчи ўринда туради.
Аввалроқ Европа Иттифоқи Шенген ҳудудига кириш учун қўшимча чекловларни жорий этгани ҳақида хабар қилинганди. Чекловлар учун тавсиялар ЕИнинг учинчи мамлакатлар билан чегараларини ҳар қандай ташриф, шу жумладан, сайёҳлик учун очишига оид янги шартларни назарда тутади.
Эслатиб ўтамиз, коронавируснинг «британча» штамми Европанинг 33 мамлакатида, дунёнинг 60 га яқин ҳудудида аниқланган.
Изоҳ (0)