Жо Байден Россияни зудлик билан Навальнийни озод қилишга чақирди

АҚШ президенти Жо Байден Давлат департаментидаги дастурий нутқида Россия ҳукуматини зудлик билан Алексей Навальнийни озод қилишга чақиришини маълум қилди, деб ёзади «РБК».

«Навальнийнинг сиёсий сабаб билан ҳибсга олиниши ва Россиянинг митинглар ўтказиш эркинлигини бўғишга уринишлари — бизда ва бутун дунё ҳамжамиятида чуқур хавотир уйғотадиган масала», — деди Байден. «Навальний коррупцияни аниқлагани учун нишонга айланди. У зудлик билан ва ҳеч қандай шартларсиз озод этилиши керак», — деди у.

Байденнинг таъкидлашича, мамлакат ҳукумати Россияга харажатларни ошириш ва ўзининг жуда муҳим манфаатларини ҳимоя қилиш олдида иккиланмайди. «Россия томонидан тажовузкор хатти-ҳаракатлар, сайловларимизга аралашувлар, киберҳужумлар, ўз фуқароларининг заҳарланиши қаршисида АҚШ ён босадиган даврлар ўз ниҳоясига етди», — дея маълум қилди у.

Аввалроқ Навальнийни озод қилиш талаби билан АҚШ давлат котиби Энтони Блинкен чиққан эди. У Вашингтон мухолифатчига нисбатан муносабатни унинг ҳуқуқлари бузилиши ва «сиёсий плюрализмнинг бостирилиши» деб баҳолашини маълум қилганди.

Бундан ташқари, Германия канцлери Ангела Меркель, Франция президенти Эммануэль Maкрон, Буюк Британия бош вазири Борис Жонсон, Австрия канцлери Себастьян Курс ҳам Москвадан Навальнийни озод этишни талаб қилган, Чехия ТИВ эса Россия элчисига суд қарори муносабати билан норозилик билдирган эди.

АҚШ давлат котиби Энтони Блинкен Россия ташқи ишлар вазири Сергей Лавров билан илк телефон суҳбатида хакерлик ҳужумлари ва Россиянинг Америкадаги сайловларга аралашуви мавзуларини кўтарган.

Аввалроқ эса Жо Байден Россиянинг хакерлик ҳужумларига алоқадорлигини ва сайловларга аралашувини текширишни буюрган эди.

2 февраль куни суд Навальнийга «Ив Роше» иши бўйича берилган шартли муддатни ҳақиқийсига алмаштирди ва 2 йил-у 8 ой колония тайинлади. Ғарб мамлакатлари сиёсатчини озод этишни талаб қилди. Москва ва Петербургда уни қўллаб-қувватлаб акциялар ўтказилди. Москванинг ўзида намойишчиларга қарши 8 мингдан ортиқ полициячилар ва гвардиячилар жалб қилинди. Улар бир ярим минг кишини ҳибсга олди.