Россиялик мухолифатчи Алексей Навальнийнинг минтақавий штаблари тармоғи раҳбари Леонид Волков сиёсатчининг жамоаси яқин дам олиш кунлари митинглар ўтказмаслигини эълон қилди. Бу ҳақда у 4 февраль, пайшанба куни «Navalniy Live» YouTube канали эфирида маълум қилди, деб ёзади «РБК».
Унинг сўзларига кўра, ҳудудларда Навальнийнинг тарафдорлари ва маҳаллий мувофиқлаштирувчилар 23 ва 31 январдаги митинглар туфайли ҳибсга олингани сабабли у ерларда акцияларни ташкиллаштирадиган одамлар йўқ. Устига-устак, ҳар ҳафта акция ўтказиш норозиликнинг кўча шаклига нисбатан ҳафсала пир бўлишига олиб келиши мумкин.
«Агар биз ҳар ҳафта норозиликка чиқадиган бўлсак, яна минглаб одамлар ҳибсга олинади, юзлаб одамлар дўппосланади. Штаблар иши тўхтаб қолади ва сайловлар бўйича ишлаб бўлмай қолади», — дея аниқлик киритди Волков. У Навальний 2021 йил кузига белгиланган давлат Думасига сайловларга тайёргарлик кўришга эътибор қаратишни сўраганини қўшимча қилди. Кейинги мухолифат акциялари баҳор ва ёзга режалаштирилган.
Бундан ташқари, Волковнинг сўзларига кўра, унинг сафдошлари дунё сиёсатчиларининг Владимир Путин билан ҳар қандай суҳбати Навальний ва унинг озод этилиши ҳақидаги масалага бориб тақалишига эришмоқчи.
«Биз уни ташқи сиёсий усуллар билан қамоқдан чиқарамиз», — деди Волков.
Россия куч вакиллари «Новичок» билан заҳарланганидан кейин Германияда даволаниб, ватанига қайтган Алексей Наванийнинг қўлга олиб, қамаб қўйганди ҳамда унинг устидан бўлиб ўтган суд оқибатида юзага келган норозилик акцияларини шафқатсизлик билан бостирганди. «ОВД-Инфо» портал ҳисоб-китобларига кўра, Россия бўйлаб 11 мингдан ортиқ одам қўлга олинган.
Изоҳ (0)