АҚШ қочқинларни қабул қилиш сонини йилига 125 минггача оширади, деб хабар берди Reuters.
Бу ҳақда АҚШ президенти Жо Байден Давлат департаментида ташқи сиёсат бўйича қилган нутқи давомида айтиб ўтди.
«Бугун мен қочқинларни қабул қилиш дастурини қайта тиклаш устида оғир ишни бошлайдиган ижро фармонини тасдиқлайман, у халқаро кўламда бу дастурга бўлган эҳтиёжни қондиришда ёрдам беради», — деди Оқ уй раҳбари.
Унинг сўзларига кўра, мазкур фармон маъмуриятнинг биринчи молиявий йилидаёқ (2021 йил 1 октябрдан бошланади) қочқинларни қабул қилиш квотаси 125 мингга етказилишини назарда тутади.
Дональд Трампнинг президенлик даврида АҚШ қочқинларни қабул қилишни деярли тўхтатиб қўйган ва 2021 йил учун 15 мингта чекланган квота белгиланган эди.
Аввалроқ Байден администрацияси Дональд Трамп президентлиги даврида айрилган мигрантлар оилаларини бирлаштириш учун ишчи гуруҳ тузишга топшириқ берди. Хусусан, бошпаналарнинг адолатли тизимини яратиш ва АҚШ жанубий чегарасидаги тартибга солинмайдиган миграция муаммосини ҳал қилиш стратегиясини ишлаб чиқишни топширди.
Эслатиб ўтамиз, Байден президентликнинг биринчи куниёқ Трампнинг энг баҳсли фармонларини бекор қилди. Хусусан, мусулмон мамлакатлар аҳолиси учун чекловни олиб ташлади, Мексика билан чегарада девор қурилишини тўхтатди, АҚШга баъзи ночор мамлакатлар фуқароларининг киришига рухсат берди.
Изоҳ (0)