AQSh qochqinlarni qabul qilish sonini yiliga 125 minggacha oshiradi, deb xabar berdi Reuters.
Bu haqda AQSh prezidenti Jo Bayden Davlat departamentida tashqi siyosat bo‘yicha qilgan nutqi davomida aytib o‘tdi.
“Bugun men qochqinlarni qabul qilish dasturini qayta tiklash ustida og‘ir ishni boshlaydigan ijro farmonini tasdiqlayman, u xalqaro ko‘lamda bu dasturga bo‘lgan ehtiyojni qondirishda yordam beradi”, — dedi Oq uy rahbari.
Uning so‘zlariga ko‘ra, mazkur farmon ma’muriyatning birinchi moliyaviy yilidayoq (2021-yil 1-oktabrdan boshlanadi) qochqinlarni qabul qilish kvotasi 125 mingga yetkazilishini nazarda tutadi.
Donald Trampning prezidenlik davrida AQSh qochqinlarni qabul qilishni deyarli to‘xtatib qo‘ygan va 2021-yil uchun 15 mingta cheklangan kvota belgilangan edi.
Avvalroq Bayden administratsiyasi Donald Tramp prezidentligi davrida ayrilgan migrantlar oilalarini birlashtirish uchun ishchi guruh tuzishga topshiriq berdi. Xususan, boshpanalarning adolatli tizimini yaratish va AQSh janubiy chegarasidagi tartibga solinmaydigan migratsiya muammosini hal qilish strategiyasini ishlab chiqishni topshirdi.
Eslatib o‘tamiz, Bayden prezidentlikning birinchi kuniyoq Trampning eng bahsli farmonlarini bekor qildi. Xususan, musulmon mamlakatlar aholisi uchun cheklovni olib tashladi, Meksika bilan chegarada devor qurilishini to‘xtatdi, AQShga ba’zi nochor mamlakatlar fuqarolarining kirishiga ruxsat berdi.
Izoh (0)