AQShning yangi prezidenti Jo Baydenni qo‘llab-quvvatlovchilar soni u saylanganidan beri birinchi marta tusha boshladi. Bu haqda The Hill nashri va HarrisX tadqiqot xizmati hamkorlikda o‘tkazgan so‘rovnomaga asoslanib “Korrespondent.net” xabar berdi.
28—29-yanvar kunlari o‘tkazilgan so‘rovda ishtirokchilarning 61 foizi Baydenning prezidentlik faoliyatini ma’qulladi. Ta’kidlash joizki, 21—22-yanvar kunlari o‘tkazilgan so‘rovnomada respondentlarning 63 foizi davlat rahbari faoliyati to‘g‘risida ijobiy fikr bildirgan edi.
Xabarga ko‘ra, so‘nggi so‘rovda respublikachilar orasida demokrat Baydenni qo‘llab-quvvatlash darajasi olti foizga — 30 foizdan 24 foizgacha pasaygan, ammo demokratlarning uning harakatlariga bergan bahosi o‘zgarmagan — 94 foiz.
So‘rovnoma 28—29-yanvar kunlari onlayn tarzda o‘tkazildi. Unda 945 respondent ishtirok etdi. Statistik xatolik darajasi, taxminan, 3,19 foizga teng.
Demokrat Bayden 20-yanvar kuni respublikachi Donald Trampning o‘rnini egallagandi. Prezident sifatidagi so‘nggi kunlarida Trampni amerikaliklarning 60 foizi “tarixdagi eng yomon prezidentlardan biri” deb atagan.
Nielsen kompaniyasining hisob-kitoblariga ko‘ra, inauguratsiya kuni Baydenning qasamyodini oltita asosiy televizion yangiliklar kanali orqali 39,9 million kishi tomosha qilgan. 2017-yilda sobiq prezident Donald Trampning inauguratsiyasini 38,35 million — Baydennikidan 4 foiz kam kishi kuzatgandi.
20-yanvar, inauguratsiya kuni Jo Bayden prezident sifatidagi ilk nutqini “Bugun — Amerika kuni. Bugun — demokratiya kuni”, — deb boshlagan.
Izoh (0)