Қозоғистон Ички ишлар вазирлиги болаларни кузатувчи тажриба лойиҳасини йўлга қўймоқда. Бу ҳақда вазир ўринбосари Сакен Сарсеновга таяниб, «Интерфакс» хабар бермоқда.
«Болалар хавфсизлиги билан боғлиқ тажриба лойиҳасини бошлаймиз. Бу тизимнинг ўзига хос жиҳати шундаки, аввал бу масалада турли дастурлар, мобил телефонлар, соатлар қўлланган ва уларнинг фаолияти исталган дақиқада тугаши мумкин бўлган батарейкаларга боғлиқ бўлган. Биз ишлатаётган кичик қурилма эса боланинг кийимига ёки сумкаси ичига тикилган ва қуввати бир йилга етади», — деди Сарсенов.
Таъкидланишича, бу қурилманинг ишлаши учун интернетга уланиш шарт эмас. Уни ишлатиш учун фақат Bluetooth’нинг ўзи кифоя.
«Барчамизга маълумки, бугунги кунда Bluetooth’дан кенг фойдаланамиз, ё наушникларимиз учун, ё соатимиз учун. Бу тизим боланинг қаердалигини аниқлашга ёрдам беради», — таъкидлади Сарсенов.
Унинг қўшимча қилишича, боланинг қаердалигини фақатгина унинг ота-онаси билади, зарур бўлганда полиция ходимлари ҳам буни аниқлаши мумкин.
«Биз ҳозир тажриба ҳудудини белгилаб олдик, бу — Олмаота шаҳри. Таълим ва фан вазирлиги тажриба ўтказиладиган мактабни аниқлаб берди. Ҳозирча лойиҳа тажриба кўринишида йўлга қўйилади, кейин йил охиригача бутун Қозоғистонга жорий қилинади», — деди вазир ўринбосари.
Маълум бўлишича, бу лойиҳа давлат-хусусий шерикчилик асосида йўлга қўйилмоқда ва давлат бюджетидан пул ажратилмаяпти. Ягона жиҳати, полиция лойиҳага оператив бошқарув тизимига уланишга рухсат берди. Қозоғистонда бундай лойиҳалар бир нечта хусусий компаниялар томонидан амалга оширилади.
Изоҳ (0)