Дональд Трамп АҚШ президентлигидан кетишдан олдин санкцияга учраган Хитой компаниялари рўйхатини кенайтиришга улгурди. АҚШ ва Хитой ўртасидаги савдо уруши бироз тинчланганига қарамай, санкциялар рўйхатидан яна 9 та компания ўрин олди, улар орасида Xiaomi ва авиакосмик техникалар ишлаб чиқарувчи Comac компаниялари ҳам бор, деб ёзади Hi-Tech.Mail.ru.
«Қора рўйхат»га тушиш америкаликларнинг ушбу Хитой компанияларига сармоя кирита олмаслиги ва уларда улуши бўлмаслигини билдиради. Тақиқ 2021 йил 11 ноябрдан кучга киради, бу вақтга қадар инвесторлар ўз акцияларини сотиб юбориши керак.
АҚШ ҳукумати 1999 йилги қонунга асосан бу каби қарорларни қабул қилмоқда. Унга кўра, мамлакат Мудофаа вазирлиги Хитой ҳарбийларига боғлиқ компаниялар рўйхатини шакллантиради. Бироқ ҳозирга қадар Америка томонидан Xiaomi ҳарбийларга тегишли эканлиги ёки улар томонидан бошқарилиши тўғрисида бирор исбот тақдим этилмаган.
Xiaomi ҳозирги кунда бутун дунё бўйлаб смартфонлар савдоси бўйича 3-ўринда кетаётган компания. АҚШда ушбу смартфонлар расман сотилмайди, фақат «ақлли» уй учун айрим товарлар ва ташқи аккумулятор каби майда техникаларни учратиш мумкин.
Xiaomi’нинг Россиядаги офиси вакили компаниянинг Хитой ҳарбийларга боғлиқлик жойи йўқлигини маълум қилган.
«Компания фуқаролик ва тижорий мақсадларда товар ва хизматларни тақдим этиш билан шуғулланишини эслатиб ўтади. Компания Хитой қуролли кучларининг мулки эмаслигини, улар билан боғлиқлиги йўқлигини, улар томонидан назорат қилинмаслиги ва АҚШ Миллий мудофаа тўғрисидаги қонунида таъкидланганидек, «коммунистик Хитой ҳарбий компанияси» эмаслигини тасдиқлайди», — дейилади хабарда.
Фонд бозорида мазкур янгилик ўз таъсирини кўрсатиб улгурди — Гонконг биржасида Xiaomi акциялари 12 фоизга тушиб кетди.
Маълумотларга кўра, Xiaomi ушбу санкцияларга қарши АҚШ Мудофаа ва Молия вазирликлари устидан Колумбия федерал округи судига даъво киритган. Компания Хитой ҳарбийларига ҳеч қандай алоқаси йўқлигини таъкидламоқда.
Эслатиб ўтамиз, 2019 йилда АҚШнинг Хитой билан савдо уруши доирасида мамлакатдаги компанияларга санкция қўллаганида бошланган, ўшандан буён Huawei компанияси АРМ архитектурасидан, Google сервисларидан фойдалана олмаяпти ва Америка компаниялари билан савдо қилиш ҳуқуқидан бутунлай маҳрум бўлган.
Изоҳ (0)