Дубайга 32 ёшли аёлни фоҳишалик қилиш учун юбораётган эгизаклар ушланди, дея хабар бермоқда Тергов департаменти.
Таъкидланишича, 2021 йилнинг 26 январь куни 32 ёшли Нилуфар Й. Бектемир тумани ИИО ФМБ бошлиғи номига ариза билан мурожаат қилган.
Аризачи унда Фотима ва Зуҳра исмли шахслар, 2021 йилнинг 3 январь кунидан то 27 январь кунига қадар бўлган вақт оралиғида Нилуфар Й.га Бирлашган Араб Амирлигининг Дубай шаҳридаги меҳмонхоналарда фоҳишалик билан моддий маблағ орттиришни таклиф қилганликларини баён қилган.
Қайд этилишича, эгизаклар Нилуфар Й.ни Дубайга бориш учун мўлжалланган ҳужжатларни тайёрлаб, 27 январь куни Ислом Каримов номидаги Тошкент халқаро аэропорти орқали юбораётган вақтларида ҳуқуқни муҳофаза қилувчи орган ходимлари томонидан ушланган.
Мазкур ҳолат юзасидан Бектемир тумани 4-сонли ИИБ Тергов бўлинмаси томонидан Фотима Б. ва Зуҳра И.га нисбатан Жиноят кодексининг 135-моддаси 2-қисми «э» банди (одам савдоси) билан жиноят иши қўзғатилиб, тергов ҳаракатларига киришилган.
Ҳозирда эгизакларни муқаддам ушбу турдаги жиноятларни содир қилиб, фуқароларни чет элга шаҳвоний ниятларда юборган ҳолатлари бор ёки йўқлигини аниқлаш мақсадида тергов ҳаракатлари олиб борилмоқда. Дастлабки тергов натижасига кўра, қонуний қарор қабул қилиниш таъминланиши таъкидланган.
Аввалроқ Туркияда ўзбекистонлик аёлларни фоҳишалик қилишга мажбурлаган жиноий гуруҳ қўлга олингани, Қўйлиқда фоҳишалик қилувчи аёл мижоз сифатида келган эркакнинг телефони ва 500 долларини тунаб кетгани ҳамда Тошкентда 28 ёшли аёлни Дубайга фоҳишалик қилиш учун юбораётган шахс қўлга олингани ҳақида хабар берилганди.
Изоҳ (0)