Москвадаги Никулин суди 90 ёшли аёлга қараган ўзбекистонлик ҳамшира аёлнинг жиноий ҳаракатлари юзасидан суд мажлиси ўтказади. Бу ҳақда Москва шаҳар прокуратурасига таяниб «Интерфакс» хабар қилган.
Никулин туманлараро прокуратураси 42 ёшли ўзбекистонлик аёлга нисбатан жиноят иши бўйича айбловни тасдиқлаган. Идора баёнотига кўра, жиноят ишига оид маълумотлар Никулин судига юборилган.
Тергов берган ахборотлар бўйича ҳамшира 90 ёшли аёлга 2020 йилнинг сентябрь ойида Мичурин шоҳкўчасида жойлашган хонадонда энагалик қилган. У шахсий сабабларга кўра нафақахўр аёлни калтаклаган, унинг юзи, баданига зарбалар берган ва ҳақоратлаган.
Аввалроқ «Россия-24» телеканали Москвада ўзбекистонлик Гулчеҳра исмли ҳамшира қизнинг 82 ёшли аёлни калтаклаб ўлдириб қўйгани ҳақида хабар берганди.
2018 йил апрелда Қозоғистоннинг Олмаота вилоятида суд ёш болага азоб берган ўзбекистонлик энагани уч йилга озодликдан маҳрум қилган.
2019 йил ноябрда Россиянинг Чельябинск вилояти Уст-Катав шаҳрида ўзбекистонлик аёл уч фарзандини 10 йил тутқунликда сақлагани, болалар қочиб кетгач, аёл ўзини ўлдиргани хабар қилинган.
Изоҳ (0)