Президент Шавкат Мирзиёев 29 январь куни Ислом цивилизацияси марказига ташриф буюриб, қурилиш жараёнига масъул бўлган мутасаддилар ва тарихчи олимлар билан мулоқот қилди. Учрашув мобайнида давлат раҳбари Ўзбекистонда хаттотлик мактабига эътиборни янада кучайтириш зарурлигини қайд этди, дея хабар бермоқда «Дарё» мухбири.
«Бизда хаттотлик мактаби йўқ. Афсуски, бу мактаблар йўқ бўлиб кетяпти. Ўзбекистондаги ягона хаттотлардан бири Ҳабибулла ака бор холос ҳозир.
Бугунги кунда бир қанча мусулмон мамлакатларда хаттотлик жуда ривожланган. Масалан, Туркияда. Шунинг учун хаттотлар мактабини яратишимиз керак. Хаттотлик яхши йўналиш. Ундаги ҳар бир белги, вергул ва нуқтанинг тагида катта маъно бор. Агар бу мактабни яратмасак, яна анча орқада қолиб кетамиз.
Одамлар айтиши мумкин, бу қаерда керак бўлади, деб. Керак бўлади. Мана, катта-катта илмий мактаблар қуряпмиз, тилларга нисбатан муносабатимиз ўзгаряпти, демак, керак бўлади. Хориждан яхши хаттотларни олиб келиб, ўз мактабимизни янада ривожлантиришимиз зарур», — дея масъулларга топшириқ берди Шавкат Мирзиёев.
Бош вазир Абдулла Ариповнинг таъкидлашича, эндиликда республикадаги бир қатор диний марказлар, олий ўқув юртлари ва Бенков номидаги республика рассомлик коллежида хаттотлик гуруҳлари очилади. Бундан ташқари, ҳар йили хаттотлар ўртасида кўрик-танловлар ўтказиш йўлга қўйилади.
Мавзуга доир:
- Шавкат Мирзиёевнинг Ислом цивилизацияси марказига ташрифи — суратларда
- Шавкат Мирзиёев: «Ўзбекистонда бугунги замон талабига жавоб берадиган гидлар йўқ»
- «Боболаримизга муносиб бино қурдик. Энди боболаримизга муносиб илмий муҳит яратишимиз керак». Шавкат Мирзиёев Ислом цивилизацияси марказига ташриф буюрди
Изоҳ (0)