Қонуний кучга кирмаган иш юзасидан ОАВга маълумот берган судьяга интизомий чора кўрилади – Судьялар олий кенгаши судьяларни огоҳлантирди

Қонуний кучга кирмаган ҳукм ёки қарор юзасидан оммавий ахборот воситаси ходимига интервью берган судьяга нисбатан интизомий чора кўрилади. Бу ҳақда Ўзбекистон Судьялар олий кенгаши матбуот хизмати раҳбари Турсунали Акбаров «Дарё»га маълум қилди.

Хабарда айтилишича, январь ойида жиноят ишлари бўйича Қува туман суди раиси ўзи кўриб чиққан, бироқ ҳали қонуний кучга кирмаган жиноят иши бўйича марказий телеканаллардан бирига интервью берган.

«Қува туман суди раиси қайд этилган ҳуқуқий ҳужжатлар талабига риоя этмагани учун Судьялар олий кенгаши қарори билан унга нисбатан интизомий жазо қўллашга розилик берилди», – дейилади Судьялар олий кенгаши ахборотида.

Маълумот учун, «Судьяларнинг одоб-ахлоқ кодекси»нинг 14-моддасига кўра, судья ҳали қонуний кучга кирмаган суд ҳукми (қарори) бўйича оммавий ахборот воситаларида чиқиш қилишга ҳақли эмаслиги қайд этилган. Айни тартиб Олий суд Пленуми қарорида ҳам кўрсатиб ўтилган. Зеро, суднинг қонуний кучга кирмаган ҳукми (қарори) бўйича оммавий ахборот воситаларида бонг уриш айбсизлик презумпциясига зид ҳисобланади.

Бундай ҳолларда судьяга нисбатан интизомий жазо чораси Судьялар олий кенгаши розилиги билан тегишли малака ҳайъати томонидан қўлланилади.

Очиқ суд мажлисларида кўриб чиқилган суд ҳужжатлари қонуний кучга кирганидан сўнг оммавий ахборот воситаларида чиқиш қилишга ҳеч қандай монелик йўқ.

Эслатиб ўтамиз, 2020 йилнинг 8 сентябрь куни Тошкент вилояти бош инфекционисти Гулжаҳон Йўлдошевага нисбатан Жиноят кодексининг 167-моддаси 3-қисми «а» банди (ўзлаштириш ёки растрата йўли билан талон-торож қилиш, жуда кўп миқдорда) ҳамда 207-моддаси 3-қисми «а» банди (мансабга совуққонлик билан қараш одам ўлишига сабаб бўлса) билан айбланувчи тариқасида ишга жалб қилинган эди. Орадан 5 кун ўтганидан сўнг – 13 сентябрда Чирчиқ шаҳар прокурори Бахтиёр Иброҳимов ОАВда терговга қадар текширув ишлари якун топмаган, айби ҳали тўлиқ исботланмаган Гулжаҳон Йўлдошеванинг айблилик масаласига кескин муносабат билдирганди. Бу билан у айбсизлик презумпциясига амал қилмаган.

Аксига олиб, Гулжаҳон Йўлдошевани судгача айбдорга чиқарган Чирчиқ шаҳри прокурори Бош прокуратурага ишга ўтган.