Бандлик ва меҳнат муносабатлари вазирлиги Давлат меҳнат инспекцияси бошлиғи Қудратилла Одинаев АОКАда ўтказилган брифингда Халқаро меҳнат ташкилотининг (ХМТ) «Учинчи томон мониторинги» лойиҳаси томонидан 2020 йилги пахта терими мавсумида болалар меҳнат ва мажбурий меҳнат ҳолатларини аниқлаш бўйича ўтказилган мониторинг натижалари ҳақида маълумот берилди.
Маълум қилинишича, ташкилот экспертлари Ўзбекистон 2020 йилда ҳам пахта йиғим-терими давомида тизимли болалар меҳнатидан умуман фойдаланмаганлиги тўғрисидаги хулосаларида қатъий қолганлиги, мажбурий меҳнатнинг бутунлай бартараф этилишида сезиларли натижаларга эришилганлиги, фуқароларни мажбурий тарзда тизимли жалб этиш ҳолатлари кузатилмагани қайд этган.
Ҳисоботда 2020 йилда пахта теримига мажбурий жалб этиш ҳолатлари 2019 йилга нисбатан 33 фоизга камайгани ва 4 фоизни ташкил этгани келтирилган.
Терилган пахта учун тўлов миқдорларининг оширилиши, меҳнат ва дам олиш шароитларининг сезиларли даражада яхшиланганлиги, шу билан бирга бу борада ҳукумат ва жамоатчилик томонидан ҳам доимий назорат олиб борилгани ҳисоботда алоҳида таъкидланган.
Аввалроқ Cotton Campaign халқаро коалицияси ўзининг расмий веб-сайтида «Ўзбек пахтачилигида ўзгараётган манзара» сарлавҳали мақола чоп этиб, Ўзбекистон 2020 йилги пахта теримида мажбурий меҳнатга барҳам беришда «сезиларли ютуқлар»га эришганини маълум қилганди.Маълумот учун, узоқ йиллар давомида пахта терими мавсумида болалар ва мажбурий меҳнатдан фойдаланилгани боис Ўзбекистон пахтаси халқаро жамоатчилик томонидан «қора рўйхатлар»га киритилган, етакчи ишлаб чиқарувчилар Ўзбекистон пахтасини бойкот қилган эди. Халқаро меҳнат ташкилотининг Вашингтондаги офиси директори Кевин Кассиди эса ўзбек пахтаси бойкотини асоссиз деб эълон қилганди.
2019 йилнинг 4 февралида ўша вақтда бош вазир ўринбосари бўлган Танзила Норбоева бошчилигидаги делегациянинг Вашингтонга ишчи ташрифида Cotton Campaign тўқимачилик маҳсулотларига қарши бойкотни бекор қилиш бўйича режасини тақдим этган эди.
Cotton Campaign халқаро коалицияси вакиллари 27 январь–6 февраль кунлари Ўзбекистонда ишчи ташриф билан бўлган эди. Улар билан бўлиб ўтган учрашувда иштирок этган инвестициялар ва ташқи савдо вазири Сардор Умурзоқов Ўзбекистон тўқимачилик саноатини бойкот қилишдан фойда йўқ, деб айтганди.
Изоҳ (0)