Қирғизистон президентининг матбуот хизмати раҳбари Нургази Анаркулов пора олиш учун товламачилик қилгани учун ҳибсга олинди. Бу ҳақда Қирғизистон давлат миллий хавфсизлик қўмитасига таяниб «ТАСС» хабар берди.
«Нургази Анаркулов эгаллаб турган лавозимидаги ваколатларини суиистеъмол қилиб, бойлик орттириш мақсадида товламачилик йўли билан давлат амалдори лавозимига жойлаштириб қўйишни ваъда қилиб, номзоддан катта миқдорда пора олган», – дейилади хабарда.
Давлат миллий хавфсизлик қўмитасининг Коррупцияга қарши кураш хизмати берган маълумотларга кўра, матбуот котиби давлат ҳокимияти органлари фаолиятидаги коррупцияга оид ҳолатларни аниқлаш, огоҳлантириш ва бартараф қилиш бўйича амалга оширилаётган ишлар доирасида ушланган.
Гумонланувчига нисбатан пора олиш учун товламачилик қилиш ҳақидаги модда бўйича судгача суриштирув-тергов ишлари бошланган.
Анаркулов 2020 йил кузида Қирғизистон президентининг матбуот хизматининг раҳбари лавозимига тайинланган эди.
Аввал 2018–2020 йиллар давомида Қирғизистон Вазирлар маҳкамасини бошқарган Муҳаммадкалий Абилгазиевнинг ҳибсга олингани ва суд қарорига кўра 2021 йил 26 мартга қадар қамоқда ушлаб турилиши ҳақида хабар берилганди. Ундан олдин Қирғизистон Миллий хавфсизлик қўмитаси собиқ раҳбари Абдил Сегизбаев ҳибсга олинган.
Изоҳ (0)