Евроиттифоқ COVID-19’га қарши вакцинанинг Буюк Британияга экспорт қилинишини тўхтатиб қўйиши мумкин. Бу ҳақда The Independent газетаси Еврокенгаш раҳбари Шарл Мишелнинг Австрия, Чехия, Дания ва Греция етакчиларига йўлланган хатига таяниб хабар берди, деб ёзади «РБК».
Нашр қўлига келиб тушган хатда айтилишича, бундай чора кўзда тутилишига AstraZeneca Британия-Швеция фармацевтик компанияси келтириб чиқарган «вакцина уруши» сабаб бўлган. У Евроиттифоққа вакцина етказиб бериш муддатини кечиктирди, аммо айни вақтда дорининг бир қисми ишлаб чиқарилаётган Британияни вакцина билан таъминлашда давом этмоқда. Компаниянинг ўзи буни Брюссель билан шартнома Лондон билан битимдан кейин имзолангани билан изоҳлади.
Мишелнинг хатида қайд этилишича, Брюссель шошилинч чораларни кўриб чиқмоқда, улар орасида Pfizer ва BioNTech компанияларининг Евроиттифоқ мамлакатларида ишлаб чиқариладиган вакцинаси экспортини тўхтатиб қўйиш режаси ҳам бор. Буюк Британия 40 миллион доза дори буюртма қилган. Тегишли таклифни Мишел Еврокомиссия раҳбари Урсула фон дер Ляйенга йўналтирган.
Еврокенгаш раҳбари AstraZeneca билан зиддият музокаралар йўли билан ҳал қилинишига умид билдирди. «Аммо қониқарли ечим топилмаса, биз барча вариантларни ўрганиб чиқиб, барча қонуний воситаларни ва мажбурлаш чораларини қўллашимиз керак, деб ўйлайман», — деган у хатида.
Еврокомиссиянинг соғлиқни сақлаш бўйича аъзоси Стелла Кириакидис AstraZeneca компаниясига COVID-19 вакцинасини етказиб бериш жараёнига ўзгартириш киритгани учун аниқлик киритишни сўраб хат юборди. Таъкидланишича, компания Европа Иттифоқига дастлаб келишилганидан анча кам дозаларни юборган. Унинг сўзларига кўра, илгари Европа Иттифоқи ушбу компания вакцинани яратиши ва уни ишлаб чиқаришини молиялаштириб, уларни тез етказиб бериш учун олдиндан буюртмалар берган. Энди расмий Брюссель «шартноманинг тўлиқ бажарилишини» хоҳламоқда. Стелланинг сўзларига кўра, «келгусида Европа Иттифоқида COVID-19 вакциналарини ишлаб чиқарадиган барча компаниялар ўз вакциналарини экспорт қилмоқчи бўлса, бу тўғрисида олдиндан хабар беришлари шарт».
Европа дори-дармон агентлиги (EMA) ушбу ҳафтанинг охирига қадар AstraZeneca вакцинасини тасдиқлаши керак эди.
Европа Иттифоқи, илгари имзоланган келишувга мувофиқ, 2021 йилнинг биринчи чорагида 100 миллион дозада вакцина олиши керак. Аммо Иттифоқ ишлаб чиқариш масалалари сабабли буюртманинг ярмини олади деган қўрқув бор.
Изоҳ (0)