Ироқда АҚШ бошчилигидаги халқаро коалиция томонидан амалга оширилган авиазарба оқибатида ИШИД террорчилик ташкилотининг раҳбарларидан бири ўлдирилди. Бу ҳақда The New York Times’га таяниб, «ТАСС» хабар берди.
Маълумотларга кўра, Абу Ясир номи билан танилган Жаббор Салмон Али Фархон ал-Иссауий 27 январь куни Киркук шаҳри яқинида йўқ қилинган. Шунингдек, яна тўққиз нафар ИШИД жангариси ўлдирилгани айтилмоқда. Мазкур операцияни ўтказишда Ироқ хавфсизлик кучлари ҳам иштирок этган бўлиб, АҚШ ҳарбийлари ҳаводан зарбани амалга оширган.
Коалиция вакили Уэйн Мароттонинг таъкидлашича, ал-Иссауийнинг ўлими ИШИД учун «жиддий зарба» ҳисобланади. Таъкидланишича, у террорчилик ташкилотининг Ироқдаги ҳаракатларини бошқарган ва ИШИДнинг мамлакатдаги таъсир доирасини кенгайтиришга уринган.
Мақолада қайд этилишича, ИШИД раҳбарларидан бирининг ўлдирилиши ўтган ҳафта Бағдодда амалга оширилган терактга жавоб ҳисобланади. Ўшанда 32 киши ҳалок бўлган ва 100 дан ортиқ одам жароҳат олганди.
Аввалроқ Туркия ИШИДга алоқадорликда гумонланаётган 4 нафар ўзбекистонликни Сурия чегарасида ҳибсга олгани тўғрисида хабар берилганди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Мавзуга доир: Афғонистонда ИШИДнинг «олий судьяси» йўқ қилинди
Изоҳ (0)