Канада ҳукумати коронавирус инфекциясининг янги штаммлари тарқалаётгани сабаб келаётган сайёҳлар учун анча қаттиқ талабларни жорий этиш бўйича қарор қабул қилди — эндиликда мамлакатга келганлар COVID-19 йўқлигига тест топшириши керак, деб хабар беради «Интерфакс».
«Мамлакатга келаётганлар маълум бир меҳмонхонада уч кунгача тест натижасини кутишлари керак. Бунда меҳмонхона фуқаронинг ўз ҳисобидан қопланади, тахминларга кўра, бу 2 минг доллар атрофида бўлади. Тест натижаси салбий чиққанлар уй карантини режимида анча қаттиқ кузатув ва назорат остида қолиши мумкин», — дея Канада бош вазири Жастин Трюдонинг сўзларини келтиради нашр.
Унинг таъкидлашича, тест натижаси ижобий чиққан фуқаролар маълум давлат муассасаларида карантинда қолиши керак бўлиб, улар COVID-19’нинг янги штамми ташувчилари эмаслиги текширилади.
Шунингдек, Канада бош вазирининг маълум қилишича, мамлакатнинг Air Canada, WestJet, Sunwing ва Air Transat авиаташувчилари 30 апрелга қадар Кариб ҳавзаси давлатлари ва Мексикага парвозларни тўхтатади. «Улар айни вақтда ушбу минтақада бўлган мижозлари билан қайта рейсларни ташкиллаштириш бўйича келишиб олишлари керак бўлади», — дейди Трюдо.
Бош вазирнинг таъкидлашича, 1 февралдан бошлаб йўловчиларни ташиш билан шуғулланувчи барча халқаро рейслар фақатгина Канаданинг тўртта шаҳридаги аэропортларига қўниши керак: Ванкувер, Торонто, Калгари ва Мореал.
Канадада пандемия бошланганидан буён қарийб 770 минг кишида коронавирус тасдиқланган бўлиб, вирус асоратлари оқибатида 20 мингга яқин киши вафот этган, 694 минг бемор соғайган.
Аввалроқ дунёда коронавирусга чалинганлар сони 100 миллион кишига етгани, Норвегияда коронавирус сабаб мамлакатга кириш ёпилгани ҳамда Перуда 31 январдан янги локдаун жорий қилиниши тўғрисида хабар берилганди.
Изоҳ (0)