Саёҳат давомида сайёҳлар кўплаб ғайриоддий воқеаларга дуч келади ва йиллар ўтгандан кейин ҳам улар ўз таассуротларини яқинлари билан ўртоқлашиб юради. Айниқса, таом борасидаги хотиралар бошқа мамлакатга ташриф буюрган сайёҳ ҳаётида унутилмас ва қизиқарли воқеаларга сабаб бўлади. Бугун энг антиқа ҳид ва таъмга эга бўлган овқатни қаерда татиб кўриш керак, деган саволга «РИА Новости» эълон қилган фотосуратлар орқали жавоб топамиз.
Чириган балиқ
Карбамид моддаси миқдорининг юқорилиги сабабли қутб акуласи гўшти заҳарли деб ҳисоблана бошлади. Шу сабабли ҳам исландиялик викинглар хаукарл, яъни чириган балиқ тайёрлашни ўрганди. Ушбу таомни узоқ сафарга отланганингизда ўзингиз билан бирга олиб кетишингиз мумкин.
Тайёрланиши жуда оддий: балиқ гўштини майда тошлар солинган идишга териб қўясиз, шунда балиқдаги суюқликлар оқиб чиқиб кетиши осон бўлади. Вақт ўтгач, уларни илгакларга осиб, яна икки ойдан тўрт ойгача қуритасиз. Таъми қайнатилган оқ балиқни эслатади, лекин ҳиди ёқимсизроқ бўлади.
Дуриан
«Дўзах ташқарида, жаннат ичкарида» – бу Таиланддаги дурианга берилган таъриф. Унинг кўринишини кўрганингиздан сўнг нега ундай дейилганига гувоҳ бўласиз. У фақат таъми учунгина эмас, балки ҳиди учун ҳам сизни ҳайратга солиши аниқ. Дурианнинг ҳиди чириган гўшт, эски пайпоқ, пиёз ва саримсоқпиёз ҳидларига таққосланган.
«Таътил вақтида турмуш ўртоғим билан дурианли музқаймоқ сотиб олишга қарор қилдик. У тўқ сариқ рангда эди, деярли мангога ўхшарди ва кўринишидан мазали деб ўйларди одам. Аввал сутли қовунга ўхшаган таъм сезилган бўлса, кейин саримсоқпиёзнинг таъмини ҳис қилиш мумкин эди. Бу даҳшат! Биз қолган музқаймоқни ортиқ еёлмадик», — дейди москвалик сайёҳ Ирина Лебедова. Ирина ўша ерлик одамлар кулганини кўриб, бундай ҳолатга дуч келган биринчи сайёҳлар биз эмасмиз шекилли, деган хулосага келди.
Айниган пишлоқ
Сиз суратда кўриб турган пишлоқнинг ватани Италиянинг Сардиния ороли ҳисобланади.
Тайёр пишлоқлар ертўладан пашшалар тухум қўйиши учун олиб чиқилади. Сўнг личинкалар пишлоқ билан озиқланади ва улар чиқарадиган ферментлар пишлоқнинг қолган қисмини юмшоқ, қаймоққа ўхшаган шаклга келтиради. Унинг номи «айниган пишлоқ» деб таржима қилинади.
«Яхшиямки мен пишлоқни татиб кўрганимда унинг тайёрланишидан бехабар эдим, акс ҳолда саёҳат давомида умуман овқатланмаган бўлардим», — деб эслайди москавлик сайёҳ Ирина Пяткова.
Юз йиллик тухум
Хитойда «юз йиллик тухум» машҳур газак ҳисобланади. Уни тайёрлаш учун маҳсулотлар бир неча ой давомида ҳаво киритилмай, махсус аралашма ҳолатида сақланиши керак. Тўғри тайёрланган тухумлар оқи эластик ҳолатда, тўқ жигарранг ва шаффоф кўринишда бўлади. Тухумнинг сариғи эса юмшоқ бўлиб, оч кул рангдан қора ранггача, кучли аммиак ҳидига эга бўлади.
Тозаланган тухумлар юзасида қишда деразаларда пайдо бўладиган музли нақшлар каби белгилар пайдо бўлади.
Денгиз бодринги
Хитой денгиз бодринги қисқичбақа гўшти ёки қора икра таомлари каби тансиқ овқат сифатида қадрланади. У сув юзасида яшайди, ташқаридан тиканли қуртга ўхшаб кетади. Жуда фойдали ҳисобланади.
«Унинг таъми юмшоқ қисқичбақаларни эслатади, аммо негадир кўриниши ёқимсизроқ», — дейди Ольга Лазерева.
Тирик саккизоёқлар
Жанубий кореяликлар тирик саккизоёқларни бутунича ёки ҳаракатланаётган қисмларини истеъмол қилади. Моллюскалар устига кунжут мойи қуйилади ва турли зираворлар сепилади. Таом «саннакчи» деб номланади.
«У худди резинкага ўхшайди, лекин бу ҳаммаси эмас! Таомни истеъмол қилаётганингизда саккизоёқлар томоғингизга ёпишиб олади, худди ҳаёт учун курашаётгандай!», — дейди Олга Лазерева.
Веджимайт
Веджимайт – Австралиянинг миллий таоми бўлиб, хамиртуруш қўшиб тайёрланган қуюқ, тўқ жигарранг кўринишидаги хамирли таом.
«Бу таом фақат австралияликлар учун, уни бошқалар татиб кўришни истамайди. Сайёҳлар ушбу таомни уйга олиб келгач ва татиб кўргач, уларнинг юзидаги ифода жуда кулгили ҳолатда бўлади", — дейди Мельбурнда яшовчи талаба қиз Анжелика.
Сюрстремминг
Сюрстрёмминг шведларнинг миллий маҳсулоти бўлиб, у тузланган селд консервасидан иборат. Шведлар ушбу маҳсулотни қайнатилган картошка, пиёз, помидор ва нон билан биргаликда истеъмол қилади.
Бақа панжаси
Бақа панжалари француз таомлари менюсига киради. Ушбу таомнинг оммалашиб кетишида черковнинг «айб»и бор. Рўза маҳалида кўп гўшт ейиш тақиқлаб қўйилган эди, натижада қурбақа оёқлари арзон муқобилга айланди.
Қизил ва қора икра
Қизил ва қора икра – чет элликлар учун тавсия этиладиган энг машҳур рус халқининг ўзига хос таъмларидан бири. Аммо сайёҳларга кўпинча бу ғалати таом сифатида кўринади. «Америкалик дўстларимнинг ҳаммаси ҳам бу таомдан татиб кўришга журъат қилмайди. Татиб кўрганлар эса бир қошиқ билан чекланади», — дейди дастурчи Вадим Гецкий.
Изоҳ (0)