Surxondaryoda Nexia avtomobili velosiped haydovchisini urib ketdi, deya xabar berildi “Yoshlar” telekanalining “Yangi davr” ko‘rsatuvida.
Kadr: Videodan skrinshot
Surxondaryo viloyati Jarqo‘rg‘on tumani “Beshbuloq” mahallasi hududidan o‘tuvchi davlat ahamiyatiga ega 4R-101 avtomobil yo‘lining 2-kilometrida yo‘l-transport hodisasi sodir bo‘lgan.
Qayd etilishicha, Nexia rusumli avtomobilning 25 yoshli haydovchisi velosiped boshqarib ketayotgan 20 yoshli yigitni urib ketgan. Oqibatda velosiped haydovchisi og‘ir tan jarohati olib, shifoxonaning jonlantirish bo‘limida vafot etgan.
“Velosiped ushlab turgan yo‘lovchini 8 metr qolganda ko‘rdim. Uni avtomobilga ortib, tez yordamga olib bordim”, – deydi haydovchi.
Mazkur holat yuzasidan Jarqo‘rg‘on tumani IIB Tergov bo‘linmasi tomonidan Jinoyat kodeksining 266-moddasining 2-qismi (odam o‘limiga sabab bo‘lgan transport boshqarish qoidalarini buzish) bilan jinoyat ishi qo‘zg‘atilgan. Hozirda dastlabki tergov harakatlari olib borilmoqda.
Avvalroq Qoraqalpog‘istonda Howo va Nexia ishtirokida sodir bo‘lgan YTH oqibatida 5 kishi halok bo‘lgani, Toshkentda 4 ta avtomobil to‘qnashishi oqibatida 5 kishi jabrlangani hamda Yunusobodda yo‘lning muzlagani sabab 6 ta avtomobil oldinma-ketin to‘qnashib ketgani haqida xabar berilgandi.
