Биринчи марта Буюк Британияда қайд қилинган коронавируснинг янги штамми Европанинг 33 та мамлакатида аниқланган. Бу ҳақда Жаҳон соғлиқни сақлаш ташкилотининг (ЖССТ) Европа минтақавий бюроси директори Ҳанс Клюге Копенгагендаги брифингда маълум қилди, дея хабар бермоқда «Известия».
Шунингдек, касалликнинг «африкача» варианти 16 та Европа мамлакатида аниқланган.
Клюгенинг таъкидлашича, сўнгги икки ҳафта ичида 30 мамлакатда янги ҳолатларнинг ўсишида сезиларли пасайиш кузатилди. Бу кўрсаткич 2 ҳафта олдин 23 мамлакатни ташкил қилган эди. Аммо тарқалиш даражаси ҳали ҳам жуда юқори бўлиб турибди.
Шу муносабат билан, Клюге Европа давлатларидан мавжуд хатарлар фонида чекловларни барвақт бекор қилмасликни сўради. Жаҳон соғлиқни сақлаш ташкилотининг Европа бўйича бюроси директорининг фикрича, энг яхши вариант – ташкилот томонидан белгиланган эпидемиологик мезонларга асосланиб чекловларни босқичма-босқич олиб ташлаш.
Аввалроқ Ўзбекистонлик олимлар коронавируснинг «британча» штаммини аниқловчи тест тизими устида иш олиб бораётгани, Буюк Британия коронавирус оқибатида вафот этганлар сони 100 мингдан ошган Европадаги биринчи давлат бўлгани ҳамда Германияда коронавирусга қарши эмланишни истамаган ходимларнинг ишдан бўшатилиши бўйича биринчи ҳолат қайд этилгани ҳақида хабар берилганди.
Изоҳ (0)