Тошкентнинг Мирзо Улуғбек туманидаги Паркент кўчасидан Мустақиллик кўчасига ўтиш йўли яна очилаётгани тўғрисида хабар берилганди. Ободонлаштириш хизмати ходимлари ҳатто ҳудудни тозалаш ишларини ҳам амалга оширган, бироқ шундан сўнг йўлнинг очилиш ишлари тўхтаб қолди.
«Podrobno.uz»нинг пойтахт ҳокимлиги матбуот хизматига таяниб ёзишича, йўлнинг ушбу қисмини очиш учун қатор жараёнларни амалга ошириш керак. Таъкидланишича, бу борада тегишли расмий сўров тайёрланиб, қатор идораларга юборилиши лозим. Ҳужжат тасдиқланиши учун бир нечта идорадан, хусусан, ИИББ, ЙҲХББ, Тошкент ҳокимлигидан ўтиши керак бўлади.
Режалаштирилган ишлар бошланиши билан тўхтаб қолган. Бироқ пойтахт ҳокимлигининг маълум қилишича, йўлни очиш бўйича ишлар давом этмоқда, батафсил маълумотлар тўғрисида кейинроқ хабар қилинади.
Узоқ йиллар давомида ёпиқ бўлган пойтахтдаги айрим кўчалар Шавкат Мирзиёев президент этиб сайланганидан кейин очилишни бошлади. 2015 йилнинг августида Оққўрғон кўчасидан Мустақиллик томон элтувчи Паркент ҳамда «Буюк ипак йўли» метро бекати йўллари темир панжаралар билан тўлиқ ёпилганди. Ўшанда собиқ Пушкин скверидан қайрилиб олиш ёпилган ва Паркент бозори томон ҳаракатланиш тақиқланган эди.
Изоҳ (0)