Литвада хатолик туфайли бир аёл бирданига беш дозада коронавирус вакцинаси билан эмланди

Литванинг Мариямпол касалхонасида бир аёлга тиббий хатолик туфайли бир дозанинг ўрнига беш доза вакцина юборилди. Бу ҳақда «Интерфакс» хабар қилди.

«Бешта дозанинг ҳаммаси бир кишига юборилган. Бу инсон омили. Беморда ҳеч қандай ножўя таъсир кузатилмаган», – деди касалхона директори Мантас Чесна. Чеснанинг маълум қилишича, аёл ўзини яхши ҳис қиляпти, фақат инъекция жойида қаттиқ оғриқ бор. Бироқ аёлга ортиқча 4 доза юборилгани учун 4 нафар киши вакцинадан қуруқ қолган.

Чеснанинг сўзларига кўра, воқеадан кейин касалхона Каунас клиникаси ва Pfizer вакиллари билан маслаҳатлашган.

Таъкидланишича, январь ойи ўрталарида содир бўлган бу воқеа бўйича тергов 29 январь куни якунланиши кутилмоқда.

Аввалроқ Германияда қариялар уйининг 8 ходими хатолик туфайли коронавирусга қарши вакцинанинг беш марта кўпроқ дозаси билан эмлангани, Норвегияда Pfizer вакцинаси билан эмланган 23 киши вафот этгани ҳамда АҚШда Pfizer вакцинаси билан эмланган икки тиббиёт ходимининг аҳволи ёмонлашгани ҳақида хабар берилганди.