Ўзбекистонда 1 февралдан тиббиёт ходимларини аҳолини коронавирусга қарши оммавий эмлашга тайёрлаш бошланади. Бу ҳақда Санитария-эпидемиологик осойишталик ва жамоат саломатлиги хизмати хабар берди.
Хусусан, уларнинг билим савияларини оширишга қаратилган тренинг ва семинар машғулотлари ўтказиш режалаштирилган. Ҳозирда коронавирусга қарши эмлаш жараёнини пухта режалаштириш ва тиббиёт ходимларини махсус «Хавфсиз иммунизация» шартлари бўйича тайёргарликдан ўтказиш бўйича чора-тадбирлар ишлаб чиқилган ва вакцинаторлар рўйхати шакллантирилган.
Маълумот учун, Ўзбекистонда айни вақтда Хитойнинг Anhui Zhifei Loncom Biofarmaceutical компанияси томонидан яратилган мазкур ZF 2001 рекомбинант вакцинасининг синовлари давом этмоқда. Шунингдек, Россиянинг «Спутник V» вакцинасини Ўзбекистонда ишлаб чиқаришни маҳаллийлаштириш режаси ҳам мавжуд. Умуман, Ўзбекистонда коронавирусга қарши вакциналар ишлаб чиқаришни йўлга қўйиш режалаштирилаётгани ҳақида 2020 йилнинг ноябрида маълум бўлганди.
Маълумот учун, вакцинацияда иштирок этадиган кўнгиллиларни тиббий кўрик ва скрингдан ўтказиш ишлари 2020 йилнинг 12 декабридан бошланган бўлиб, 2021 йил 27 январига қадар 9583 нафар кўнгилли тиббий кўрик ва суҳбатдан ўтказилган. 2020 йилнинг 12 декабридан 27 январига қадар жами 4617 нафар кўнгиллида вакцинациянинг 3-клиник синов босқичлари амалга оширилган.
Изоҳ (0)