O‘zbekistonda 1-fevraldan tibbiyot xodimlarini aholini koronavirusga qarshi ommaviy emlashga tayyorlash boshlanadi. Bu haqda Sanitariya-epidemiologik osoyishtalik va jamoat salomatligi xizmati xabar berdi.
Xususan, ularning bilim saviyalarini oshirishga qaratilgan trening va seminar mashg‘ulotlari o‘tkazish rejalashtirilgan. Hozirda koronavirusga qarshi emlash jarayonini puxta rejalashtirish va tibbiyot xodimlarini maxsus “Xavfsiz immunizatsiya” shartlari bo‘yicha tayyorgarlikdan o‘tkazish bo‘yicha chora-tadbirlar ishlab chiqilgan va vaksinatorlar ro‘yxati shakllantirilgan.
Ma’lumot uchun, O‘zbekistonda ayni vaqtda Xitoyning Anhui Zhifei Loncom Biofarmaceutical kompaniyasi tomonidan yaratilgan mazkur ZF 2001 rekombinant vaksinasining sinovlari davom etmoqda. Shuningdek, Rossiyaning “Sputnik V” vaksinasini O‘zbekistonda ishlab chiqarishni mahalliylashtirish rejasi ham mavjud. Umuman, O‘zbekistonda koronavirusga qarshi vaksinalar ishlab chiqarishni yo‘lga qo‘yish rejalashtirilayotgani haqida 2020-yilning noyabrida ma’lum bo‘lgandi.
Ma’lumot uchun, vaksinatsiyada ishtirok etadigan ko‘ngillilarni tibbiy ko‘rik va skringdan o‘tkazish ishlari 2020-yilning 12-dekabridan boshlangan bo‘lib, 2021-yil 27-yanvariga qadar 9583 nafar ko‘ngilli tibbiy ko‘rik va suhbatdan o‘tkazilgan. 2020-yilning 12-dekabridan 27-yanvariga qadar jami 4617 nafar ko‘ngillida vaksinatsiyaning 3-klinik sinov bosqichlari amalga oshirilgan.
Izoh (0)