Кир ювиш машинангиз ёмон ишлаяптими? Ювилган кийимларингиздан нам ҳиди келиб қоляптими? Демак, сиз унга етарлича эътибор қаратмаяпсиз. Машинанинг ички қисмларини вақтида ва тўғри тозалашни Goodhouse’да берилган қизиқарли маълумотлар орқали биргаликда ўрганамиз!
- 2 стакан сирка;
- чорак стакан ош содаси;
- чорак стакан сув;
- идиш ювишга мўлжалланган губка.
Ушбу процедура кир ювиш машинасини тозалашда жуда яхши натижа беради. Сирка ва ош содаси кир ювиш машинасининг ички қисмини ювишга, совундан қолган қолдиқлардан халос бўлишга, вақт ўтиши билан пайдо бўладиган бактериялар ва моғорлардан қутулишга ёрдам беради.
Биринчи қадам: Машинанинг ичини тозалаш- Машинани тозалайдиган аралашмани тайёрлаш учун ош содаси ва сувни кичик идишга соламиз ва аралаштирамиз.
- Сиркани стаканга қуйиб оламиз.
- Ош содаси ва сувдан тайёрланган аралашмани машинанинг сода солинадиган қисмига қуямиз.
- Машинанинг ичига сиркани қуямиз.
- Кир ювиш учун белгиланадиган ҳароратни энг юқорисига қўйиб, эшигини ёпамиз ва ишга тушириш тугмасини босамиз.
- Ювиш вақти тугагач губкада машинанинг ички қисмини яхшилаб артиб чиқамиз.
Иккинчи қадам: Кир ювиш машинасининг эшик қисмидаги резинкаларини тозалаш
Ушбу тозалаш доимий равишда такрорланиб туриши керак. Резинкага зарар етади деб қўрқманг, губкада анча вақтдан бери йиғилган чиқиндиларни олиб ташланг. Улар орасида турли чанглар, соч толалари, иплар, тангалар, баъзан болалар пайпоқлари ҳам қолиб кетиши мумкин. Ушбу чанглар машина эшиги ҳар сафар ёпилганида йиғилиб бораверади. Агар кийимларингизни ювиб бўлганингиздан сўнг ярим соат давомида эшигини очиқ қолдирсангиз, бундай бўлмайди.
Учинчи қадам:
Машинанинг сода солинадиган қисмида чанг ва моғор йиғилиб қолаётганига ҳайрон бўлманг. Қўлингиз билан ушбу қисмни машинадан ажратиб олинг. Кейин сода ёки бошқа тозалаш воситасида иссиқ сув билан яхшилаб ювинг. Машинадаги форсункани (кукунларни пуфлаб берувчи қисм) ювишни ҳам унутманг. Тозалаш учун тиш чўткасидан фойдалансангиз мақсадга мувофиқ.
Тўртинчи қадам: Фильтрларни тозалаш
Кир ювиш машинасининг энг муҳим қисми – уни ифлосланишдан сақлаб қолувчи ва машинанинг ишлаш муддатини узайтириб берувчи насос фильтри ҳисобланади. Одатда у кичик эшикнинг ўнг томонида жойлашган бўлади. Ушбу қисмни ҳар олти ойда бир марта тозалаб туриш керак, акс ҳолда машина сувни тўкишни секин амалга ошира бошлайди. Бу эса ювиш сифатига таъсир қилади.
Шундай қилиб эшикни очасиз ва фильтр қисмини ажратиб оласиз. Йиғилиб қолган соч толалари ва чангларни олиб ташлайсиз.
Фильтр қисмини тозалайман деб уни ёнидаги шланглар билан адаштириб юборманг. Уларни баъзи ҳолларда ишлатасиз. Агар машина бирор сабабга кўра сувни тўкишни тўхтатиб қўйса, ундан фойдаланишингиз мумкин. Уни доимий тозалаб юришнинг ҳожати йўқ. Лекин нимага керак эканини ва қаерда жойлашганини билиш зарар қилмайди.
Изоҳ (0)