Айниқса, қиш мавсумида уйда ўстириладиган гуллар бўлса, эртами-кечми уларнинг барглари сарғайиши кўп учрайдиган ҳолат. Демак, парвариш борасида нимадир нотўғри амалга оширилаётган бўлиши мумкин. Буни қуйидагича аниқласа бўлади:
Жуда кўп ёки кам суғориш
Одатда тупроқнинг устки қатлами тезроқ қурийди. Натижада ўсимликлар худди сувсиз қолгандек туйилади. Аслида эса бундай эмас. Тупроқ намлигини тўғри аниқлаш учун бармоқни тувакка 2-3 сантиметр чуқурроқ киритиб кўриш керак.
Тупроқ текширилгандан сўнг қуруқлик аниқланса, дарҳол бир стакан миқдорда сув қуйиш керак. Шунингдек, ўсимликларни мунтазам суғоришда ушбу текширувни амалга ошириш зарур.
Агар тупроқ, аксинча, жуда нам бўлса, ўсимликларнинг илдизни текшириш зарур. Сабаби улар кўп суғориш натижасида зарарланиб, чириш аломатлари пайдо бўлган бўлиши мумкин. Бу каби вазиятда ўсимликни бошқа идишга кўчириб, уни сўлиб қолишдан асраш лозим. Шунингдек, суғориш борасида юқоридаги кўрсатма тавсия этилади.
Зараркунандаларни текшириш
Агар суғориш тартиб билан амалга оширилаётган бўлса, демак, япроқлар сарғайишининг сабаби зараркунандалар бўлиши мумкин. Улардан энг кенг тарқалгани — оқ қанотли чивин ва ўргимчак кана. Баъзан уларни дарҳол аниқлаш қийин, шунинг учун япроқларни синчковлик билан кўриб чиқиш зарур.
Агар баргларда майда тешик ёки оқ нуқталар, шунингдек, ўргимчак тўрига ўхшаш тўр пайдо бўлган бўлса, демак зараркунандалар мавжуд. Улар хона ҳароратида ўзини жуда яхши ҳис этади. Уларни бартараф этиш учун ўсимлик барги яхшилаб ювилиши керак. Бунинг учун кир ювиш совуни ёки идиш ювиш воситасини ишлатиш мумкин. Шундан сўнг уларга акарицид ва инсектоакарицид гуруҳидан махсус препаратларни қўллаш керак. Агар уй шароитида фақат табиий маҳсулотдан фойдаланиш керак бўлса, унда «Ним» мойи ёрдам бериши мумкин.
Ўсимликларга қуёш нурининг тушиши
Сарғайган баргларнинг яна бир сабаби – қуёш нурларининг етишмаслигидир. Албатта, бу куз ва қиш мавсумида кўпроқ кузатилади. Барча деразалар қуёшга тескари томонда бўлса, ўсимликлар зарар кўради. Шунинг учун ўсимликларни дераза ёнига қўйиш ёки сунъий ёритишни ташкил қилиш зарур. Ёруғликнинг етишмаслиги биринчи навбатда ўсимликнинг пастки қисмида акс этади. Улар сарғайиб, сўлишни бошлайди.
Елвизакдан сақлаш
Хонаки ўсимликларнинг аксарияти табиий тропик мамлакатларга хос бўлиб, улар совуқ ва елвизакка чидамли эмас. Шунинг учун ҳам ўсимлик бироз очиқ дераза қаршисида туриб, сарғайган бўлса, ҳайрон бўлиш керак эмас. Шунингдек, ўсимлик салқин хонада бўлса, уни суғоришни камайтириш зарур. Айтганча, ўсимликлар нафақат совуқ мавсумда, балки доимий ишлайдиган кондиционер остида ҳам музлаши мумкин. Азотли ўғит етишмаслиги туфайли эски барглар сарғаяди, янгилари эса яшил рангда тураверади. Шунинг учун азотли ўғитни меъёрида қўшишни унутмаслик зарур. Ортиқчаси яна уларга зарар бериши мумкин.
Изоҳ (0)