2019 йилда «Пахтакор»га ўтиши можарога айланган Азиз Турғунбоев ниҳоят пойтахт клуби футболчисига айланди

«Навбаҳор» ҳужумкор ярим ҳимоячиси Азиз Турғунбоев фаолиятини «Пахтакор»да давом эттиради. Бу ҳақда «шерлар» матбуот хизмати маълум қилди.

Тошкентликлар матбуот хизматининг маълум қилишича, «Пахтакор» ва «Навбаҳор» жамоаларида ўртасидаги ўзаро келишувга кўра Турғунбоев «шерлар» сафига ўтган. Азиз пойтахт жамоаси билан 2 йиллик шартнома имзолади.

Эслатиб ўтамиз, 2019 йил бошида Турғунбоев ўша вақтда «Навбаҳор» аъзоси бўлишига қарамай, «Пахтакор» билан шартнома имзолаган ва бу катта можарога сабаб бўлганди.

Турғунбоев 2018 йилнинг сентябрь ойида «Пахтакор» билан шартнома имзолайди. Бироқ «Навбаҳор» билан амалдаги келишуви 30 ноябрда тугаши кўзда тутилган Азиз 29 ноябрь куни наманганликлар раҳбарияти босими билан «Навбаҳор» билан янги шартномага қўл қўяди. Кейинчалик декабрь ойи ўрталарида «Пахтакор» билан яна бир шартномани имзолаган. Бироқ ПФЛ трансфер ойнаси 17 декабрь куни очилгани боис, унга қадар юқоридаги ҳеч бир шартномани рўйхатдан ўтказмайди.

Шу тариқа катта можарога айланган иш январь ойида ЎФА Этика қўмитаси томонидан ўрганиб чиқилади. Якунда Футболчиларнинг мақоми ва ўтиши бўйича регламент қоидаларини бузган Турғунбоев олти ой муддатга футболга оид фаолиятдан четлатилади. Шунингдек, бу ишда қатнашган «Навбаҳор» собиқ бош мураббийи Илҳом Мўминжонов бир йилга, икки клуб мутасаддилари Шамшод Сариков ва Жаъфар Ирисметов эса олти ой муддатга дисквалификация қилинади.

Дисквалификация муддатини ўтаб бўлгач, 2019 йилнинг июль ойида, Турғунбоев «Навбаҳор» сафига бориб қўшилганди. 27 ёшли футболчи ҳозирга қадар Ўзбекистон чемпионатида 110 та ўйинда иштирок этиб, 26 та гол уришга эришган.