“Navbahor” hujumkor yarim himoyachisi Aziz Turg‘unboyev faoliyatini “Paxtakor”da davom ettiradi. Bu haqda “sherlar” matbuot xizmati ma’lum qildi.
Toshkentliklar matbuot xizmatining ma’lum qilishicha, “Paxtakor” va “Navbahor” jamoalarida o‘rtasidagi o‘zaro kelishuvga ko‘ra Turg‘unboyev “sherlar” safiga o‘tgan. Aziz poytaxt jamoasi bilan 2 yillik shartnoma imzoladi.
Eslatib o‘tamiz, 2019-yil boshida Turg‘unboyev o‘sha vaqtda “Navbahor” a’zosi bo‘lishiga qaramay, “Paxtakor” bilan shartnoma imzolagan va bu katta mojaroga sabab bo‘lgandi.
Turg‘unboyev 2018-yilning sentabr oyida “Paxtakor” bilan shartnoma imzolaydi. Biroq “Navbahor” bilan amaldagi kelishuvi 30-noyabrda tugashi ko‘zda tutilgan Aziz 29-noyabr kuni namanganliklar rahbariyati bosimi bilan “Navbahor” bilan yangi shartnomaga qo‘l qo‘yadi. Keyinchalik dekabr oyi o‘rtalarida “Paxtakor” bilan yana bir shartnomani imzolagan. Biroq PFL transfer oynasi 17-dekabr kuni ochilgani bois, unga qadar yuqoridagi hech bir shartnomani ro‘yxatdan o‘tkazmaydi.
Shu tariqa katta mojaroga aylangan ish yanvar oyida O‘FA Etika qo‘mitasi tomonidan o‘rganib chiqiladi. Yakunda Futbolchilarning maqomi va o‘tishi bo‘yicha reglament qoidalarini buzgan Turg‘unboyev olti oy muddatga futbolga oid faoliyatdan chetlatiladi. Shuningdek, bu ishda qatnashgan “Navbahor” sobiq bosh murabbiyi Ilhom Mo‘minjonov bir yilga, ikki klub mutasaddilari Shamshod Sarikov va Ja’far Irismetov esa olti oy muddatga diskvalifikatsiya qilinadi.
Diskvalifikatsiya muddatini o‘tab bo‘lgach, 2019-yilning iyul oyida, Turg‘unboyev “Navbahor” safiga borib qo‘shilgandi. 27 yoshli futbolchi hozirga qadar O‘zbekiston chempionatida 110 ta o‘yinda ishtirok etib, 26 ta gol urishga erishgan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)