«Челси» Томас Тухель бошқарувидаги илк ўйинда АПЛнинг 3 рекордини янгилади

«Челси» Премьер Лига 20-турида 27 январь куни «Вулверҳэмптон» билан ўйнади. Томас Тухелнинг лондонликлар бошқарувидаги илк ўйинида 0:0 ҳисобидаги дуранг натижа қайд этилди.

«Челси» футболчилари мазкур баҳсда 820 та аниқ узатма амалга оширди ва ўйиннинг 78,9% қисмида тўпга эгалик қилди.

Шунингдек, «кўклар» биринчи бўлимда 433 та аниқ узатма амалга оширишга эришди.

Ҳар учала кўрсаткич Премьер Лигада статистика ҳисобланиши бошланган 2003/04 йилги мавсумдан кейинги энг юқори натижа ҳисобланади.

Эслатиб ўтамиз, Тухель ўйиндан бир кун аввал «Челси» бош мураббийи этиб тайинланди. У лондонликлар бошқарувида Фрэнк Лэмпарднинг ўрнини эгаллади.