Қонунчилик палатасида депутатлар томонидан Ўзбекистонда 30 июль санасини Халқлар дўстлиги куни этиб белгилаш ҳақидаги қонун лойиҳаси кўриб чиқилиб, қабул қилинди. Бу ҳақда парламент қуйи палатаси матбуот хизмати хабар қилди.
Таъкидланишича, Халқлар дўстлиги кунини белгилаш қарори жамиятда, халқлар ва давлатлар ўртасида ҳамжиҳатлик, бағрикенглик, миллатлараро тотувликни мустаҳкамлашга қаратилган.
Қонун уч ўқишда қабул қилинган ва Сенатга юборилган.
Маълум қилинишича, Ўзбекистонда 130 дан ортиқ миллат ва элат вакиллари, шунингдек, 16 диний конфессия вакиллари истиқомат қилади. Мамлакатда 141 миллий маданий марказ мавжуд.
Бундан ташқари, «Gazeta.uz»нинг маълум қилишича, 30 июль — Халқаро дўстлик куни. Ушбу кун 2011 йил 3 майда БМТ Бош ассамблеяси томонидан эълон қилинган. Мазкур масала бўйича резолюцияда «халқлар, мамлакатлар, маданиятлар ва шахслар ўртасидаги дўстлик, тинчликни таъминлаш бўйича саъй-ҳаракатларни илҳомлантириши ва маданий хилма-хилликни ҳурмат қиладиган жамиятлар ўртасида кўприклар яратиш имкониятини яратиши мумкин», деб таъкидланган.
Аввалроқ Ўзбекистонда 22 сентябрь – Автомобильсиз кун деб эълон қилингани ҳамда БМТ 8 ва 9 май кунларини Иккинчи жаҳон уруши қурбонларини хотирлаш куни деб эълон қилгани ҳақида хабар берилганди.
Изоҳ (0)