«Ҳокимимиз атрофидаги ҳомийларга ишониб, маррани катта олди» – депутат намунали маҳалла раисларига 50 та Spark’нинг қай тартибда берилиши ҳақида

Халқ депутатлари Тошкент шаҳар кенгашининг 19 январь куни бўлиб ўтган 31-сессиясида Тошкент шаҳар ҳокими Жаҳонгир Ортиқхўжаев намунавий деб топилган пойтахтдаги 50 та энг яхши маҳалла раисининг ҳар бирига ҳомийлар томонидан 50 та Spark автомобили берилишини маълум қилганди. Бу эса ижтимоий тармоқларда қизғин муҳокамаларни келтириб чиқарди.

Тошкент шаҳар ҳокимлигида 21 январь куни ўтказилган Халқ депутатлари Тошкент шаҳар кенгашининг 31-сессияси натижалари ҳамда жорий йил режаларига бағишланган матбуот анжуманида автомашинага муносиб 50 та маҳалла раиси қай тартибда аниқланиши юзасидан тушунтириш берилди, дея хабар қилмоқда «Дарё» мухбири Миролим Исажонов.

Мирзо Улуғбек туманидаги «Каттақорасув» МФЙ раиси, халқ депутатлари Тошкент шаҳар кенгаши депутати Наима Жабборованинг айтишича, автомобилга муносиб МФЙлар танлаб олинаётганида, у ерда яшовчи аҳолининг фикри ҳам ўрганилади.

«Мен комиссияга ҳамма рақамларимни чиройли қилиб топширишим мумкин. Лекин бу кўрик-танловга ўхшаган. Юқоридан пастга тушиб, аҳолидан раисинг ким, қанақа, деб уларнинг ҳам фикрини сўрашади. Маҳалланинг фақат қоғоздаги кўрсаткичи эмас, амалда қандай иш олиб боряпти, маҳаллада урф-одатлар қандай ривожланяпти, салоҳияти борми, болалар маҳалла нима эканлигини тушунадими, йўқми, шу тарафларга ҳам қаралади. Бу борада коррупция, таниш-билишчиликка йўл қўйилмайди. Ҳозир «Мен ёки фалончи раис машина олади», деб айтолмайман. Чунки бу жуда ҳам қийин жараён.

Ҳокимимиз бу борада низом ишлаб чиқилишини айтди. Ҳар бир туман комиссияси ўз номзодларини кўрсатганидан кейин шаҳар комиссияси низом асосида уларнинг ишини чуқур ўрганади. Комиссия таркибида Маҳалла ва оилани қўллаб-қувватлаш вазирлиги ҳамда унинг Тошкент шаҳар бошқармаси мутахассислари бўлади. Агар машина фаолияти қониқарсиз маҳаллага берилса ва бу хабар ОАВда эълон қилинса, ўша ҳудуд аҳолиси бундан хабар топиб, албатта, норозилик билдиради. Тўғри, беш қўл баробар эмас. Сайлов пайтида ҳамма раислар юз фоиз шаффофлик билан сайланди, деб айта олмаймиз. Халқ ўзи хоҳлаган одамни сайламаган ҳам бўлиши мумкин. Лекин автомашиналар энг намунали, ҳақиқатан маҳалла раиси, деган лавозимга муносибларга берилади», — деди Наима Жабборова.

Матбуот анжуманидан кейин ОАВ вакиллари мазкур масала бўйича ўзларини қизиқтирган яна бир қанча саволларга Наима Жабборовадан жавоб олишди.

Депутатнинг таъкидлашича, пойтахт ҳокимининг ушбу ташаббуси МФЙ вакилларига мотивация бериб, уларни янада фаол ишлашга ундайди.

«Автомашина бериш жараёни адолатли бўлади. Чунки ҳомий бир нарсани бераётганидан кейин уни текшириб, ишонч ҳосил қилади, нарсаси жойига етиб боришини истайди. Буни давлат текширолмайди, ҳомийнинг ўзи текширади. Машинага муносибларни аниқлаш жараёни жуда ҳам қийин масала. Тўғри, ҳокимимиз ташаббус билан чиқди, лекин буни амалга оширилиши жуда мураккаб кечади. Агар мазкур жараёнда нотўғри ҳаракатлар кузатилса, тўполон кўтарилади. Шунинг учун тўғри ва адолатли ҳал этишга ҳаракат қилинади. Мендан ҳам яхши раислар бор, менинг ҳудудимдан ҳам аъло маҳаллалар бўлиши мумкин. Машина ўша аълоларнинг аълосига берилиши керак. Бу МФЙ вакилларига мотивация беради, янада яхши ишлашга ундайди.

Назаримда, ҳокимимиз маҳалла раисларини уйғотиш учун шу ташаббус билан чиқди. Очиғини айтиш керак, кўп жойларда ишлар ухлаб ётибди, ҳамма жойда бир хил ишлар қилинаётгани йўқ. Лекин энди кўпчилик яхши ишлаяпти. Охирги икки йил ичида силжиш бор. Нима учун? Чунки маҳаллалар ва раисларга нисбатан талаб ҳам бор, эътибор ҳам бор», — деди депутат.

«Каттақорасув» МФЙ раисининг таъкидлашича, автомашиналарнинг ҳаммаси ҳомийлар кўмаги билан харид қилиниб, энг муносиб МФЙларга берилади.

«Очиғини айтаман, ҳокимимиз жуда баланд маррани олди. Демак, уларнинг атрофида ҳомийлар борки, ўшаларга ишониб, маррани катта олди. Улар қисқа муддатда атрофига шундай елкадошларни олдики, маҳалла учун. Тадбиркорлар ҳам нимага ёрдам беряпти, биласизми, мана пандемия пайтини эсланг. Президентимиз тадбиркорларга ‘ёрдам беринглар’, деб мурожаат қилди. Тадбиркорларнинг ҳаммаси ‘лаббай’ деб, кимдир дори олиб берди, кимдир бошқа ёрдам кўрсатди. Буларнинг бошида Президентимиз турибди. Давлатимиз раҳбари тадбиркорликни ривожлантиришга катта куч йўналтиряпти, уларга катта эътибор қаратяпти, тадбиркорлар ҳам шунга жавобан давлатимизга ёрдам беряпти. Қарс икки қўлдан чиқади», — деди Жабборова.