Ижтимоий тармоқларда Хоразм вилояти Хазорасп туманида бир одам кўп қаватли бинодан ўзини ташламоқчи бўлгани тасвирланган видео тарқалди. Ушбу ҳодиса ҳақида «Zamon.uz» Хоразм вилояти ИИБ матбуот хизматига таяниб маълумот берди.
Маълум бўлишича, воқеа 23 январи куни соат 13:30 ларда Хазорасп тумани тиббиёт бирлашмасида содир бўлган. Хазорасп туманида яшовчи 1977 йил туғилган шахс тиббиёт бирлашмаси томига чиққан.
Ўзини томдан ташламоқчи бўлган шахс тиббиёт бирлашмаси ходимлари томонидан пастга олиб тушилгандан кейин маълум бўлишича, у ўзининг хатти-ҳаракатларини англай олмайдиган даражада кучли маст ҳолатда бўлган. Фуқаро оила аъзолари ҳамроҳлигида қўйиб юборилган.
Ҳозирда Хазорасп ИИБ томонидан шахснинг хатти-ҳаракатларига ҳуқуқий баҳо бериш учун суриштирув ишлари олиб борилмоқда.
Аввалроқ Ширин шаҳар ҳокимлиги «ҳаётдан чарчаб», икки боласини каналга оқизиб юбормоқчи бўлган аёл воқеаси бўйича изоҳ бергани, Тошкентдаги «Саёҳат» меҳмонхонасида карантинда бўлган эркак тўртинчи қаватдан сакраб ўз жонига қасд қилгани ҳамда Тошкентда ночор аҳволда қолган фарғоналик аёл ўзини электр узатиш устунидан ташламоқчи бўлгани ҳақида хабар берилганди.
Изоҳ (0)