“Hokimimiz atrofidagi homiylarga ishonib, marrani katta oldi” – deputat namunali mahalla raislariga 50 ta Spark’ning qay tartibda berilishi haqida

Xalq deputatlari Toshkent shahar kengashining 19-yanvar kuni bo‘lib o‘tgan 31-sessiyasida Toshkent shahar hokimi Jahongir Ortiqxo‘jayev namunaviy deb topilgan poytaxtdagi 50 ta eng yaxshi mahalla raisining har biriga homiylar tomonidan 50 ta Spark avtomobili berilishini ma’lum qilgandi. Bu esa ijtimoiy tarmoqlarda qizg‘in muhokamalarni keltirib chiqardi.

Toshkent shahar hokimligida 21-yanvar kuni o‘tkazilgan Xalq deputatlari Toshkent shahar kengashining 31-sessiyasi natijalari hamda joriy yil rejalariga bag‘ishlangan matbuot anjumanida avtomashinaga munosib 50 ta mahalla raisi qay tartibda aniqlanishi yuzasidan tushuntirish berildi, deya xabar qilmoqda “Daryo” muxbiri Mirolim Isajonov.

Mirzo Ulug‘bek tumanidagi “Kattaqorasuv” MFY raisi, xalq deputatlari Toshkent shahar kengashi deputati Naima Jabborovaning aytishicha, avtomobilga munosib MFYlar tanlab olinayotganida, u yerda yashovchi aholining fikri ham o‘rganiladi.

“Men komissiyaga hamma raqamlarimni chiroyli qilib topshirishim mumkin. Lekin bu ko‘rik-tanlovga o‘xshagan. Yuqoridan pastga tushib, aholidan raising kim, qanaqa, deb ularning ham fikrini so‘rashadi. Mahallaning faqat qog‘ozdagi ko‘rsatkichi emas, amalda qanday ish olib boryapti, mahallada urf-odatlar qanday rivojlanyapti, salohiyati bormi, bolalar mahalla nima ekanligini tushunadimi, yo‘qmi, shu taraflarga ham qaraladi. Bu borada korrupsiya, tanish-bilishchilikka yo‘l qo‘yilmaydi. Hozir “Men yoki falonchi rais mashina oladi”, deb aytolmayman. Chunki bu juda ham qiyin jarayon.

Hokimimiz bu borada nizom ishlab chiqilishini aytdi. Har bir tuman komissiyasi o‘z nomzodlarini ko‘rsatganidan keyin shahar komissiyasi nizom asosida ularning ishini chuqur o‘rganadi. Komissiya tarkibida Mahalla va oilani qo‘llab-quvvatlash vazirligi hamda uning Toshkent shahar boshqarmasi mutaxassislari bo‘ladi. Agar mashina faoliyati qoniqarsiz mahallaga berilsa va bu xabar OAVda e’lon qilinsa, o‘sha hudud aholisi bundan xabar topib, albatta, norozilik bildiradi. To‘g‘ri, besh qo‘l barobar emas. Saylov paytida hamma raislar yuz foiz shaffoflik bilan saylandi, deb ayta olmaymiz. Xalq o‘zi xohlagan odamni saylamagan ham bo‘lishi mumkin. Lekin avtomashinalar eng namunali, haqiqatan mahalla raisi, degan lavozimga munosiblarga beriladi”, — dedi Naima Jabborova.

Matbuot anjumanidan keyin OAV vakillari mazkur masala bo‘yicha o‘zlarini qiziqtirgan yana bir qancha savollarga Naima Jabborovadan javob olishdi.

Deputatning ta’kidlashicha, poytaxt hokimining ushbu tashabbusi MFY vakillariga motivatsiya berib, ularni yanada faol ishlashga undaydi.

“Avtomashina berish jarayoni adolatli bo‘ladi. Chunki homiy bir narsani berayotganidan keyin uni tekshirib, ishonch hosil qiladi, narsasi joyiga yetib borishini istaydi. Buni davlat tekshirolmaydi, homiyning o‘zi tekshiradi. Mashinaga munosiblarni aniqlash jarayoni juda ham qiyin masala. To‘g‘ri, hokimimiz tashabbus bilan chiqdi, lekin buni amalga oshirilishi juda murakkab kechadi. Agar mazkur jarayonda noto‘g‘ri harakatlar kuzatilsa, to‘polon ko‘tariladi. Shuning uchun to‘g‘ri va adolatli hal etishga harakat qilinadi. Mendan ham yaxshi raislar bor, mening hududimdan ham a’lo mahallalar bo‘lishi mumkin. Mashina o‘sha a’lolarning a’losiga berilishi kerak. Bu MFY vakillariga motivatsiya beradi, yanada yaxshi ishlashga undaydi.

Nazarimda, hokimimiz mahalla raislarini uyg‘otish uchun shu tashabbus bilan chiqdi. Ochig‘ini aytish kerak, ko‘p joylarda ishlar uxlab yotibdi, hamma joyda bir xil ishlar qilinayotgani yo‘q. Lekin endi ko‘pchilik yaxshi ishlayapti. Oxirgi ikki yil ichida siljish bor. Nima uchun? Chunki mahallalar va raislarga nisbatan talab ham bor, e’tibor ham bor”, — dedi deputat.

“Kattaqorasuv” MFY raisining ta’kidlashicha, avtomashinalarning hammasi homiylar ko‘magi bilan xarid qilinib, eng munosib MFYlarga beriladi.

“Ochig‘ini aytaman, hokimimiz juda baland marrani oldi. Demak, ularning atrofida homiylar borki, o‘shalarga ishonib, marrani katta oldi. Ular qisqa muddatda atrofiga shunday yelkadoshlarni oldiki, mahalla uchun. Tadbirkorlar ham nimaga yordam beryapti, bilasizmi, mana pandemiya paytini eslang. Prezidentimiz tadbirkorlarga ‘yordam beringlar’, deb murojaat qildi. Tadbirkorlarning hammasi ‘labbay’ deb, kimdir dori olib berdi, kimdir boshqa yordam ko‘rsatdi. Bularning boshida Prezidentimiz turibdi. Davlatimiz rahbari tadbirkorlikni rivojlantirishga katta kuch yo‘naltiryapti, ularga katta e’tibor qaratyapti, tadbirkorlar ham shunga javoban davlatimizga yordam beryapti. Qars ikki qo‘ldan chiqadi”, — dedi Jabborova.