Қашқадарё вилоятининг Қарши туманида ижтимоий оғир аҳволга тушиб қолган беш нафар аёлга тошкентлик тадбиркор томонидан саховат қилиниб, уй-жой қуриш учун 100 миллион сўм пул берилди. Воқеа ҳокимлик ташаббуси билан телевидение журналистлари томонидан тасвирга ҳам олинди. Бироқ эфирга кетмади.
«Дарё» мухбири Отабек Қўлдошев билан суҳбатлашган аёллар воқеанинг эфирга кетмаслик сабабини очиқлади.
«2020 йил 18 май куни менга собиқ хотин-қизлар қўмитаси раиси Муқаддас Мирсаидова қўнғироқ қилиб, Қовчин қишлоғига етиб боришимни, бизга икки сотихдан ер берилаётганини айтди. Мен қувонганимдан тез етиб бордим. Борсам, мингга яқин одам йиғилган экан. Ҳамма, ҳатто прокурор ҳам бор экан. Кейин ўша ерда одамларга 500 минг сўмдан пул, икки бошдан қўй ва 10 тадан товуқ ҳам беришди. Кейин бизни — беш нафар аёлни эр-хотин, эр-хотин қилиб ажратишиб, ‘Сизлар уй-жой учун’, дейишди. Ва ‘тошкентлик тадбиркор Адҳам Бердиев 100 миллион сўм пулни сизларга уй-жой учун совға қилди’, дейишди. Ақидахоним деган блогер мени бир қадам олдинга чиқариб, 100 миллион сўм пулни қўлимга тутқазди. Пулни 10 дақиқалар ушлаб турдим. Кейин пул ушлаб турган ҳолатимни телевидениега тасвирга олишди. Ҳар тарафимдан расмларга олишди.
Сўнгра Ақидахоним пулни қайтариб олиб, ҳокимият вакиллари — Муқаддас опа ва Нодир аканинг қўлига берди. Тўғриси, пулни кўриб қувонганимдан йиғлаб юбордим. Кейин Ақидахонимга ўша Адҳам Бердиев деган тадбиркорга миннатдорлик билдириш учун телефон рақамини сўрадим. Ақидахоним ‘Йўқ, тадбиркор намозхон одам, у берганини айтмаслигимни сўраган, шунинг учун телефон рақамини беролмайман, гаплашсангиз ўзимнинг телефонимдан гаплаштираман’, деди. Шунда мен телефонни қўлимга олаётгандим, хўжайиним мен гаплашай деди. Ва тадбиркор билан телефонда гаплашиб, миннатдорлик билдирди. Тадбиркор ҳам пулни бизга уй учун бериб юборганини айтиб, ‘икки ойда сизларнинг уйларингиз битади’, деди. Шундан сўнг пулни ҳокимият вакиллари машинага солиб, олиб кетишди. Шундан бери на пулни кўрдик ва на уйни», — дейди Венера Шодмонова.
Пулини ололмай сарсон бўлаётган аёллардан яна бири Зилола Норқулова ҳоким хайрия қилинган пулга уларга уй қуриб беришни ваъда қилганини, уйнинг эшикларини темирдан эмас, тахтадан қуриб беришини алоҳида таъкидлаганини айтди.
«Мирсаидова менга телефон қилиб, ‘Зилола Қовчин қишлоғига тез етиб кел, сенга уй берилади’, деди. Мен ҳатто йўл пулим ҳам йўқ, боролмайман дегандим, ‘йўл пулингни ҳам бераман, тез оиланг билан етиб кел’, деди. Бордим. Борсам, кўп одам йиғилган экан. Поликлиниканинг орқа томонидаги намунали уйларни кўрсатиб, ‘Сизларга ҳам мана шунақа уй қуриб берилади, ўтиб кўринглар’, деди. Ўтсак, 30 нафарга яқин уста ишлаётган экан. Буни кўриб, тўғриси, хурсанд бўлиб кетдик. Муқаддас опа менга, ‘мана фарзандинг вафот этганди, Худо сенга уйли бўлишни насиб қилди’, деди. Кейин тадбирда Ақидахоним тадбиркор томонидан 100 миллион сўм пул бизга хайрия қилинганини айтди ва Венера опага пулни берди. Ҳоким опа эса ‘шу пулга сизларга уй қуриб берамиз. Фақат темир эшиклимас, ёғоч эшикли қилиб қурамиз ва икки ойда кўчиб кирасизлар деди’, — дейди Зилола Норқулова.
Зилола Норқулованинг айтишича, мазкур томоша телевидениега ҳам тасвирга олинган.
«Телевидениега ‘съёмка’ қилиб, расмларга олиб бўлишгач, 100 миллион сўм пулни Ақидахоним Муқаддас опага берди. Муқаддас опа эса кул ранг сумкадаги пулни Нодир акага узатди. Нодир ака пулни оқ машинага солди ва кетишди», — дейди Зилола Норқулова.
Зилола Норқулова уларга берилган 20 миллион сўм пулни излаб, ҳокимиятга сўраб боравергач, ҳеч қандай жавоб бўлмаганини, шу сабабдан ҳам ҳолат бўйича прокуратурага, ДХХга мурожаат қилишга мажбур бўлганини айтмоқда.
«Туманимиз прокурори Алишер Мирзаев 20 миллион сўмга товуқ катак ҳам қуролмайсан, нима қиласан пулнинг кетини қувиб деди», — дейди мурожаатчи аёл.
Зилола Норқулованинг билдиришича, улар ўзига берилган пулни сўраб, туман ҳокими Мақсуда Мустафоеванинг ёнига ҳам борган.
«Ҳоким опанинг олдига борганимизда у киши ‘Ақидахоним менинг қизим бўлади. Мен шу туманга ҳоким бўлганим учун у ўша пулларни сизларга олиб келган. Пул менда, хоҳлаган одамимга бераман’, деди», — дейди Зилола Норқулова.
Хайрия қилинган пулни ўз қўли билан ушлаган, аммо пулга эга чиқолмаган аёл — Венера Шодмонованинг турмуш ўртоғи пул учун тадбиркорга миннатдорлик ҳам изҳор қилганини айтмоқда.
«Мен тадбиркор Адҳам Бердиев билан суҳбатлашиб, унга пул учун миннатдорлик билдирдим. Унга бериб юборган пули халққа, жумладан, бизга берилганини айтгандим. Энди эса бунақа томоша бўлиб ўтирибди», — дейди Венера Шодмонованинг турмуш ўртоғи Хушмурод Исоқов.
«Менга қишлоғимиздаги хотин-қизлар бўйича мутахассис Латофат опа телефон қилиб, ‘Нилуфар, оиланг билан Қовчин қишлоғига тез етиб кел, сизларга уй-жой учун ер бериляпти экан’, деди. Мен етиб борганимда кўп одам йиғилган экан. Кимгадир пул, кимгадир қўй, яна кимгадир эса товуқ берилди. Бизга, қолган беш нафар аёлга эса Ақида опа мана 100 миллион пул деб кўрсатиб, ‘беш кишининг номига, ўзларингизга берилса, ишлатиб юборишларингиз мумкин, шунинг учун ҳоким опанинг қўлида туради. Сизларга қуриладиган уйга ишлатилади’, деди», — дейди Нилуфар Хайруллаева.
Нилуфар Хайруллаева ўзига берилган 20 миллион сўмга қачон уй қурилишини билиш мақсадида ҳоким Мақсуда Мустафоева қабулига бир неча маротаба борганини, ҳар сафар «кутинглар, қуриляпти» деган жавобдан бошқа тайинли жавоб ололмаганини билдирди.
«Бизни олиб борган хотин-қизлар бўйича масъул — Латофат опага ваъда қилинган пул ёки уй қани деб сўраганимда, ‘билмасам, у нарса жим бўлиб кетди. Ўзларингиз суриштиринглар’, деди», — дейди мурожаатчи Хайруллаева.
Нилуфар Хайруллаева уй масаласида ҳоким Мақсуда Мустафоевани бир неча маротаба безовта қилгач, ҳоким унга қўпол гапириб, ҳақорат қилганини айтмоқда.
«Фуқаролар дардини эшитмайдиган, ёрдам сўраб борган аёлларни ҳақоратлаб, қўлини кўрсатадиган ҳоким керакмас бизга», — дейди у.
Мазкур тадбирда қатнашган журналист Отабек Усмонов ўша куни Қашқадарё вилоят телевидениеси журналистларига кўмаклашганини айтиб, 100 миллион сўм пул берилаётганини эшитганини, бироқ пуллар кейинчалик қандай сарфланганидан хабари йўқлигини айтди.
«Дарё» мухбири билан суҳбатлашган Қарши тумани маҳалла ва оилани қўллаб-қувватлаш бўлими бошлиғи Отаниёз Раҳмонов ушбу воқеалардан хабари йўқлигини, бу воқеалардан сўнг ҳокимликка ишга ўтганини билдирди.
Ҳоким Мақсуда Мустафоева меҳнат таътилида бўлгани сабаб у билан телефон орқали мулоқот қилмоқчи бўлиб, қўнғироқ қилдик. Ҳоким икки марта қилинган телефон қўнғироғига жавоб бермагач, ҳолатга изоҳ сўраб, ҳокимнинг биринчи ўринбосари Сардор Абдуллаев билан боғландик. Ҳокимнинг биринчи ўринбосари «Мазкур иш билан шуғулланган Муқаддас Мирсаидова воқеадан яхши хабардор бўлгани сабаб ўзи изоҳ беради», деди.
«Дарё» мухбири билан мулоқот қилган Муқаддас Мирсаидова эса пулини ололмаётганини айтган Зилола Норқуловага туман прокурори Алишер Мирзаев ташаббуси билан уй берилганини айтиб, видео ва расмлар тақдим қилди. Зилола Норқулова эса унга берилган уй мактабнинг эски биноси эканлигини айтиб, яшаш учун берилган нотурар жой эрта-индин яна қайтариб олинишидан қўрқиб, уйни қабул қилмаганини билдирди.
Муқаддас Мирсаидованинг қўшимча қилишича, айни кунда пулини ололмаётганини айтган аёлларнинг барчасига яшаш учун бошпана қилиб берилган. Туман ҳокимлиги ахборот хизмати маълумотига кўра, Зилола Норқулова ҳамда Венера Шодмоновага «Ровот» маҳалласидаги ижтимоий ҳимояга муҳтож оилалар учун ажратилган бинодан, Нилуфар Хайруллаевага эса «Ғубдин» МФЙ ҳудудидаги нотурар бино яшаш учун қулай ҳолатга келтириб берилган.
Ҳокимлик ахборот хизматининг 2020 йил 21 майдаги ушбу тадбир ҳақида ёзган хабарида таъкидланишича, ўша куни ҳомийлар кўмагида 87 та оилага 500 минг сўмдан моддий ёрдам, парранда боқиш истагида бўлган 20 та хонадонга 10 донадан товуқ, 25 та оилага эса 1 бошдан қўй берилгани айтиб ўтилган. Қолаверса, 22 нафар фуқарога 2 сотих ҳажмдаги бир қаватли 2 ва 3 хонадан иборат бўлган уйлар қуриб берилиши ҳам таъкидланган. Демак, ҳокимлик ахборот хизмати мурожаатчи аёлларнинг уй қуриб берилиши ҳақидаги гапини тасдиқламоқда.
Ҳокимлик ахборот хизматининг «Дарё» сўровига жавобан ёзган айни кундаги муносабатида эса биринчи хабардаги баъзи маълумотлар ўзгарган. Яъни ўша тадбирда 87 та оилагамас, 100 та оилага 500 минг сўмдан пул берилган. Қўй берилган хонадонлар сони ҳам 25 тамас, 20 та. Уй-жойини қуришда кўмаклашиладиган хонадонлар сони ҳам 12 тага камайтирилиб, 10 тага яқин дейилмоқда.
Шу ўринда савол туғилади. Ҳокимлик ахборот хизмати нега икки хил маълумот келтириб, жамоатчиликни чалғитмоқда? Аслида қайси маълумот тўғри?
Иккинчи ахборотда пул кўринишида ёрдам олган оилалар сони 87 тадан 100 тага кўпайиб қолганини тушунтираркан, туман ҳокимлиги ахборот хизмати раҳбари Али Эргашев буни хайрия тадбири кейинчалик ҳам давом эттирилгани билан изоҳлади. Айни вақтда у қўй олган оилалар сони 25 тадан 20 тага камайиб қолиши сабабини тушунтириб беролмади. «Рақамда адашган бўлишимиз мумкин», — деди Али Эргашев.
Дастлабки маълумот тўғри бўлса, нега ҳокимлик уй-жой қуришга мўлжалланган пулларни сарфламаган ёки эгаларига қайтармаган?
Қайтармаган дейилишига асос бор, албатта.
«Дарё» мухбири билан шу ҳақда суҳбатлашган блогер Ақида Моҳирова 5 нафар аёлга саховат тариқасида берилган 100 миллион сўм пул айни кунда ҳокимликда эканлигини, аёлларга ваъда қилинган уй қурилиши бошлаб юборилганини ва буни шахсан ўзи назорат қилаётганини билдирди. Қарши туман ҳокимлигининг айни кундаги расмий муносабатида эса Ақидахоним томонидан етказилган хайр-саховат пуллари аллақачон эндигина пойдевори қуриб битказилган уй қурилишига сарфлаб бўлингани ёзилган.
«Ўша пайт аёлларга, айнан ўша 5 та оилага 100 миллион сўмга улар учун уй қурилади деб айтилган. Улар бунга ҳўп дейишгач, пулни ҳокимликка топширдим», — дейди блогер Ақида Моҳирова.
Хўш, жамоатчиликни ким алдамоқда? 100 миллион сўм хайр-саховат пулларини олиб, унга эга чиқолмаганини айтаётган мурожаатчи аёлларми? Ёки закот пуллари аллақачон уй қурилишига сарфлаб юборилди деган ҳокимликми? Ёинки, пуллар ҳокимликда, уй қурилиши бошланган ва бу иш шахсан менинг назоратимда деётган блогерми?
Саволлар кўп, жавобларга эса меҳнат таътилидан қайтиши кутилаётган ҳоким Мақсуда Мустафоева жавоб беради, деган умиддамиз.
Изоҳ (0)