Қўшма Штатлардаги коронавирусга қарши эмлаш дастури кутилгандек натижани бермади. Бу ҳақда 26 январь, сешанба куни Оқ уйдаги брифингда президент Жо Байден маълум қилди, деб ёзмоқда «РБК».
Байден шифокорлар, олимлар ҳамда COVID-19 учун дори-дармон ишлаб чиқиш ва дастурни ишга туширишда иштирок этган Трамп маъмуриятининг хизматларини тан олди. «Бироқ эмлаш дастури кутилганидан кўра ёмонроқ бўлганини аниқладик», — деди Байден.
Шу муносабат билан АҚШ яқин келажакда Moderna ва Pfizer компанияларидан яна 100 миллион дозадан вакцина сотиб олиши кутилмоқда.
«Биз ушбу 200 миллион дозадан иборат қўшимча партиялар ёзда етказиб берилишини кутмоқдамиз», — дея президент унинг маъмурияти ишлаб чиқарувчиларга сўров юборганини таъкидлади.
Бундан ташқари, Оқ уй эмлаш дастурини таҳлил қилиб, штатларга дори-дармон етказиб беришни кўпайтиришга қарор қилди. «Биз штат ва ҳудудлар ўртасида тақсимланадиган дори-дармон миқдорини, тахминан, 15 фоизга оширамиз — ҳафтасига 8,6 миллиондан 10 миллион дозага ошади», — деди давлат раҳбари.
Байден мамлакат аҳолисининг аксариятига вакцина олиш учун бир неча ой вақт кераклигини америкаликлар англаб етиши лозим, дея таъкидлади. «Яқин ойларда вакцинация эмас, балки ниқоблар коронавирусга қарши энг ишончли ҳимоя бўлади. Мутахассислар ниқобларнинг апрель ойига қадар 50 минг кишининг ҳаётини сақлаб қолиши мумкинлигини ҳисоблаб чиқди », — деди президент. Шунингдек, давлат раҳбари ушбу даврда пандемия билан боғлиқ вазият янада оғирлашиши мумкинлигини, эҳтимол, февраль ойининг охирига келиб Қўшма Штатларда ўлимлар сони ярим миллионга кўтарилишини айтди.
Аввалроқ АҚШда коронавирусга қарши эмланганлар сони қарийб 10 миллион кишига етгани ҳамда COVID-19’га қарши вакцина олган киши бир неча соат ўтиб, вафот этгани юзасидан тергов бошлангани ҳақида хабар қилинганди.
Эслатиб ўтамиз, Трамп АҚШда COVID-19 билан боғлиқ аҳвол ҳақидаги маълумотларни «ҳаддан ташқари бўрттирилган» деб атаган. Байден эса президентликнинг биринчи куниёқ Трампнинг энг баҳсли фармонларини бекор қилган.
Изоҳ (0)