АҚШ Касалликларни назорат қилиш ва профилактикаси маркази (CDC) Ўзбекистон Санитария-эпидемиологик осойишталик ва жамоат саломатлиги хизматининг 20 нафар эпидемиологи ҳамда Тошкент тиббиёт академиясининг 10 нафар мураббийи учун беш кунлик дала эпидемиология ўқув дастурини (FETP) бошлади. Бу ҳақда АҚШнинг Ўзбекистондаги элчихонасига таяниб «Gazeta.uz» хабар берди.
Элчихонанинг аниқлик киритишича, FETP — бу соғлиқни сақлаш ходимлари учун тизимнинг барча даражаларида эпидемиологик тадқиқотлар ўтказиш ва касалликларнинг келиб чиқишига чора кўриш қобилиятини яхшилашга қаратилган ўқув дастури ҳисобланади.
Режалаштирилган тренинг уч ойлик ўқитиш модулидан иборат бўлиб, у ишлаб чиқаришдан узилмаган ҳолда амалга оширилади. CDC ушбу дастурнинг Тошкент тиббиёт академияси тузилмасининг интеграциялашувига ёрдам беради ва кейинчалик у Ўзбекистон Соғлиқни сақлаш вазирлиги томонидан қўллаб-қувватланади.
«Дастурнинг Ўзбекистондаги битирувчилари мамлакатнинг COVID-19 тарқалишини ўз вақтида аниқлаш ва унга чора кўриш борасидаги потенциалини мустаҳкамлайди, касалликларни кузатиш тизимларини яратиш ва маҳаллий ҳамжамиятларнинг касалликка оид тажрибаларини тушунишига ўз ҳиссаларини қўшади», — дейилади элчихона хабарида.
Мавзуга доир: Ўзбекистонда ҳамшира, шифокор ва ўқитувчиларнинг маошлари 2021 йилда бир неча баравар оширилади
Изоҳ (0)