Ўзбекистоннинг Коррупцияга қарши курашиш агентлиги кўплаб тадбиркорлар ва фуқаролар, шунингдек, ижтимоий тармоқ фойдаланувчиларининг Coca-Cola Ichimligi Uzbekiston Ltd МЧЖнинг хусусийлаштириш жараёни амалдаги қонунчилик ва тартибларга зид равишда ўтказилаётганлиги тўғрисидаги мурожаатларини ўрганиб чиқди. Гап алкоголсиз ичимлик ишлаб чиқарувчи ушбу компания устав фондининг 57,118 фоизга тенг давлат улуши сотувга қўйилиши жараёнлари ҳақида кетмоқда.
Ўрганишлар натижаси тендер шартларига киритилган бир қатор талаблар савдоларда қатнаша оладиган шахслар доирасини кескин қисқартиришга ҳамда қатор коррупцион омилларни келтириб чиқаришга шароит яратаётганлигини кўрсатган.
Агентликнинг фикрича, ушбу мезонлар ўта юқори ва асослантирилмаган талаблар ҳисобланади ва савдоларда иштирок этиши мумкин бўлган эҳтимолий иштирокчилар сонини сунъий чеклашга олиб келади.
«Эҳтимолий иштирокчилар сонини кескин чеклаш тендер шартларини бажара олувчи кам сонли иштирокчилар ўртасида ҳақиқий рақобат бўлмаслигига ва натижада давлат улушига паст нарх таклиф этилишига ҳамда бунинг оқибатида Ўзбекистон Республикаси иқтисодий манфаатларига сезиларли даражада зарар етказилишига олиб келиши мумкин», — дейилади агентлик баёнотида.
Шу муносабат билан, Коррупцияга қарши курашиш агентлиги тегишли идораларга қуйидаги чораларни амалга ошириш мақсадга мувофиқлиги юзасидан тақдимнома киритган:
- давлат мулкини сотишда тендер савдоларини ўтказиш бўйича Давлат комиссияси томонидан етарли рақобатга имконият мавжуд эмаслиги сабабли мазкур тендер жараёнларини тўхтатиш;
- тендер савдоларида иштирок этишга кўпроқ талабгорларни жалб қилиш ҳамда тенг имконият ва шароитлар яратиш мақсадида халқаро молиявий ва ҳуқуқий маслаҳатчиларнинг хулосалари асосида тендер шартларини юмшатиш бўйича ишларни олиб бориш.
Ўзбекистон Давлат активларини бошқариш агентлиги Coca-Cola Ichimligi Uzbekiston Ltd МЧЖ устав капиталидаги 57,118 фоиз улушини ошкора сотув жараёни орқали сотиш истагини 2020 йилнинг декабрь ойида эълон қилганди.
Ушбу компания давлат улушининг сотилиши бўйича кўрсатган шартлар орасида сотиб олувчи камида 7 йиллик тажрибага эга бўлиши, йиллик соф тушуми 200 миллион доллардан кам бўлмаслиги, алкоголсиз ичимликлар бўйича халқаро тажрибага эга бўлиши кабилар келтирилган. Бундай талаблар «ғолиб харидор олдиндан аниқ», деган шубҳалар пайдо қилган.
Декабрь ойида бош вазир ўринбосари Жамшид Қўчқоров Coca-Cola’нинг давлат улушини сотиб олиш учун 3 та таклиф тушганини, 70 миллион доллар беришга тайёр компания билан музокара бошланишини маълум қилганди. Январь ойи бошларида Туркиянинг Coca-Cola İçecek компанияси Coca-Cola Uzbekiston’даги давлат улушини харид қилиш учун ариза бергани маълум бўлди.
Изоҳ (0)