Нью-Йоркда эркак иш берувчисига итни қайтариб беришдан бош тортди. У жонивор учун ҳатто қамоқда ҳам ўтирди

Нью-Йоркда эркак компанияга тегишли итни қайтаришдан бош тортгани туфайли қамоққа олинди. Бу ҳақда Esquire хабар бермоқда.

37 ёшли Барри Мирик М&М Environmental’да зараркунандаларга қарши кураш бўйича мутахассис бўлиб ишлаган. 4 йил давомида Рокси лақабли искович ит унинг содиқ ҳамкори бўлган. Компания Рокси учун озиқ-овқат ва ветеринария тўловларини қоплаган, шунингдек, итни махсус машғулотлари учун ҳам пул тўлаган. Аммо Барри уни ўзи билан олиб кетган ва у билан яшай бошлаган.

«Рокси менинг энг яқин дўстим, — дейди Барри. — Биз узоқ вақтдан бери ажралмас бўлиб қолгандик ва буни ҳеч нарса ўзгартиролмайди». Барри ҳаттоки оёғига Роксининг тасвирини татуировка қилдирган. Шунингдек, у итни оиласининг аъзоси деб билади. Коронавирус пандемияси бошланганидан кўп ўтмай, Барри ишдан бўшатилган. Шундан сўнг у хизмат машинаси ва жиҳозларини компанияга қайтариб берган, аммо Роксини ўзи билан олиб кетган. Ўшанда 2020 йилнинг март ойи эди.

2020 йилнинг 25 июнь куни компания томонидан Баррига хат юборилган. Унда ит компанияга тегишли экани ва унинг зудлик билан қайтарилиши талаб қилинган. Барри уларга рад жавоб қайтарганидан сўнг компания Роксини ўғирланган, деб даъво қилган. Барри шунда ҳам компаниянинг талабларини бажаришдан бош тортган ва 2020 йилнинг август ойида Нью-Йорк полицияси уни олиб кетган.

«Мен 15 соат қамоқда ўтирдим. Буни ҳатто энг ашаддий душманимга ҳам тиламаган бўлар эдим, — дейди Барри. — У ерда 20 та бузғунчи билан битта камерада ўтиришимга тўғри келди. Уларнинг ҳикояларни эшитиш одамни ақлдан оздиради. Масалан, биттаси ўгай отасини бейсбол таёқчаси билан урган. Мен эса биргина ит туфайли бу ерга келганимни ҳеч кимга айта олмадим».

Кейинчалик компания журналистларга Баррини қайта ишга олишини ва 2020 йилнинг июнь ойига қадар уни иш жойига қайтишини кутаётганини айтган. Бироқ Барри Филадельфияга кўчиб ўтган ва, агар ишга қайтиши мумкинлигини билганида, шаҳарни тарк этмаслигини маълум қилган.

Бундан ташқари, Барри 2016 йилда имзолаган шартномасида, агар у компанияда ишламаса, итни қайтариб бериши кераклиги ҳақида ёзилганини тан олган. Бироқ компания дарҳол итни қайтаришни талаб қилмаганини таъкидлаган.

Ҳозирда суриштирув ишлари давом этмоқда ва судья Баррига иш тугамагунча итни ўзида сақлашга рухсат берган. М&М адвокати Гери Портнинг таъкидлашича, Рокси сингари итни ўргатиш ўртача 15000 доллар туради. «Аммо менинг мижозим бу йигитга 15000 долларни совға қилмаган», — дейди адвокат. Шунингдек, адвокат, агар ит Баррига қолдирилса, у ўзининг зараркунандаларга қарши курашиш бизнесини бошлашга қарор қилиши мумкинлигини таъкидлаган. Аммо бунга қарши Барри: «Бу мен ўйлашим мумкин бўлган энг сўнгги масала», — дея эътироз билдирган.

«Менинг яқинларим итни бериб, унинг ўрнига янгисини олишимни айтганди. Аммо аллақачон банкдаги ҳисоб рақамим бўшатилган, ўзим эса қамоқдаман. Улар яна нималар қилиши мумкин, билмадим. Шундай бўлса ҳам охиригача курашмоқчиман», — дейди Барри.