Лувр музейи яқинидан катталиги одамдек келадиган лаққа балиқ тутилди

Париждаги Лувр музейи яқинида катталиги одамдек келадиган лаққа балиқ ушланди, деб хабар беради Daily Mail.

Балиқчи Сена дарёсидан улкан балиқни чиқариб олганида, унинг атрофида ҳайратга тушган инсонлар тўпланган. «Кимдир бу ‘Сена Лох-Несси’ деб бақирди. Одамлар балиқни динозаврлар ва махлуқларга алоқадор демоқда», — дейди воқеани видеога олган Лина Ловиса Нильссон исмли гувоҳ.

Нильссоннинг тахминича, бу Париж марказида қармоққа илинган энг катта балиқ ҳисболанади. У Сенада тутилган энг катта лаққа балиқнинг узунлиги 1,9 метрга етганини аниқлаган. Лувр яқинидан тутилган балиқнинг катталиги ҳам шундай келади. «Мен ўзим борган бирорта катта шаҳарда бу каби ҳолатни кўрмаганман», — дея таъкидлайди аёл.

Аввалроқ америкалик эркак синган қармоқда 90 килоли балиқ тутгани, австралиялик балиқчи 30 йиллик фаолияти давомидаги энг катта балиқни тутишга муваффақ бўлгани тўғрисида хабар берилганди.