Nyu-Yorkda erkak ish beruvchisiga itni qaytarib berishdan bosh tortdi. U jonivor uchun hatto qamoqda ham o‘tirdi

Nyu-Yorkda erkak kompaniyaga tegishli itni qaytarishdan bosh tortgani tufayli qamoqqa olindi. Bu haqda Esquire xabar bermoqda.

37 yoshli Barri Mirik M&M Environmental’da zararkunandalarga qarshi kurash bo‘yicha mutaxassis bo‘lib ishlagan. 4 yil davomida Roksi laqabli iskovich it uning sodiq hamkori bo‘lgan. Kompaniya Roksi uchun oziq-ovqat va veterinariya to‘lovlarini qoplagan, shuningdek, itni maxsus mashg‘ulotlari uchun ham pul to‘lagan. Ammo Barri uni o‘zi bilan olib ketgan va u bilan yashay boshlagan.

“Roksi mening eng yaqin do‘stim, — deydi Barri. — Biz uzoq vaqtdan beri ajralmas bo‘lib qolgandik va buni hech narsa o‘zgartirolmaydi”. Barri hattoki oyog‘iga Roksining tasvirini tatuirovka qildirgan. Shuningdek, u itni oilasining a’zosi deb biladi. Koronavirus pandemiyasi boshlanganidan ko‘p o‘tmay, Barri ishdan bo‘shatilgan. Shundan so‘ng u xizmat mashinasi va jihozlarini kompaniyaga qaytarib bergan, ammo Roksini o‘zi bilan olib ketgan. O‘shanda 2020-yilning mart oyi edi.

2020-yilning 25-iyun kuni kompaniya tomonidan Barriga xat yuborilgan. Unda it kompaniyaga tegishli ekani va uning zudlik bilan qaytarilishi talab qilingan. Barri ularga rad javob qaytarganidan so‘ng kompaniya Roksini o‘g‘irlangan, deb da’vo qilgan. Barri shunda ham kompaniyaning talablarini bajarishdan bosh tortgan va 2020-yilning avgust oyida Nyu-York politsiyasi uni olib ketgan.

“Men 15 soat qamoqda o‘tirdim. Buni hatto eng ashaddiy dushmanimga ham tilamagan bo‘lar edim, — deydi Barri. — U yerda 20 ta buzg‘unchi bilan bitta kamerada o‘tirishimga to‘g‘ri keldi. Ularning hikoyalarni eshitish odamni aqldan ozdiradi. Masalan, bittasi o‘gay otasini beysbol tayoqchasi bilan urgan. Men esa birgina it tufayli bu yerga kelganimni hech kimga ayta olmadim”.

Keyinchalik kompaniya jurnalistlarga Barrini qayta ishga olishini va 2020-yilning iyun oyiga qadar uni ish joyiga qaytishini kutayotganini aytgan. Biroq Barri Filadelfiyaga ko‘chib o‘tgan va, agar ishga qaytishi mumkinligini bilganida, shaharni tark etmasligini ma’lum qilgan.

Bundan tashqari, Barri 2016-yilda imzolagan shartnomasida, agar u kompaniyada ishlamasa, itni qaytarib berishi kerakligi haqida yozilganini tan olgan. Biroq kompaniya darhol itni qaytarishni talab qilmaganini ta’kidlagan.

Hozirda surishtiruv ishlari davom etmoqda va sudya Barriga ish tugamaguncha itni o‘zida saqlashga ruxsat bergan. M&M advokati Geri Portning ta’kidlashicha, Roksi singari itni o‘rgatish o‘rtacha 15000 dollar turadi. “Ammo mening mijozim bu yigitga 15000 dollarni sovg‘a qilmagan”, — deydi advokat. Shuningdek, advokat, agar it Barriga qoldirilsa, u o‘zining zararkunandalarga qarshi kurashish biznesini boshlashga qaror qilishi mumkinligini ta’kidlagan. Ammo bunga qarshi Barri: “Bu men o‘ylashim mumkin bo‘lgan eng so‘nggi masala”, — deya e’tiroz bildirgan.

“Mening yaqinlarim itni berib, uning o‘rniga yangisini olishimni aytgandi. Ammo allaqachon bankdagi hisob raqamim bo‘shatilgan, o‘zim esa qamoqdaman. Ular yana nimalar qilishi mumkin, bilmadim. Shunday bo‘lsa ham oxirigacha kurashmoqchiman”, — deydi Barri.