Қашқадарёдаги мавжуд ер майдонлари яшил, сариқ ва қизил тоифага ажратилгани маълум қилинди

Қашқадарёдаги мавжуд 2 миллион 856 минг 799 гектар ер майдони ўрганишларга кўра, яшил, сариқ ва қизил тоифага ажратилди. Бу ҳақда Давлат кадастрлари палатасининг вилоят бошқармаси бошлиғи Ғайрат Ҳамроев маълум қилди, дея хабар берди «Дарё» мухбири.

Таъкидланишича, Давлат кадастрлари палатасининг Қашқадарё вилояти бошқармаси ташаббуси билан ҳудудда фаолият юритувчи журналист ва блогерлар учун пресс-тур ташкил этилган.

Унда сўз олган бошқарма бошлиғи Ғайрат Ҳамроев вилоятдаги мавжуд ер майдонларини аниқлаш ва уларнинг нима мақсадда фойдаланилаётганини билиш учун хатлов ўтказилганини маълум қилган.

«Вилоятда 2 миллион 856 минг 799 гектар ер майдони мавжуд бўлиб, қишлоқ хўжалиги ерлари 2 миллион 179 330 гектарни, аҳоли пункти 151 909 гектарни, ўрмон фонди ерлари эса 410 215 гектарни, саноат, транспорт ва бошқа ерлар 71 774 гектарни, тарихий-маъданий ерлар 2 567 гектарни, сув фонди ерлари 37 175 минг гектарни, захира ерлар 3 819 гектарни ташкил қилади», — деди бошқарма бошлиғи.

Бошқарма бошлиғининг аниқлик киритишича, вилоятда хатлов жараёнлари 2020 йилнинг 17 ноябридан бошланган бўлиб, икки ой давом этган. Хатлов натижасига кўра, вилоятдаги ер майдонларининг ҳужжати мавжуд ёки мавжуд эмаслигига қараб яшил, сариқ ва қизил тоифага ажратилган.

«Яшил тоифага 227 131 та кўчмас мулк ва ер майдонлари киритилган бўлиб, бундай ерлар жисмоний ва юридик шахсларга тегишли бўлган, эгалик ҳуқуқи мавжуд, давлат рўйхатидан ўтказилган ва кадастр йиғма жилдлари тўғри шакллантирилган, расмийлаштириш ишлари якунланган ерлар ҳисобланади. Сариқ тоифадаги ерлар ва объектлар эса 478 889 тани ташкил этиб, бундай ерлар эгалик ҳуқуқи мавжуд бўлиб, кадастр ҳужжати қилинмаган ерлар ҳисобланди. Қизил тоифадаги ерлар ҳамда объектлар вилоятда 19 467 та бўлиб, уларга эгалик ҳуқуқи берилмаган ва бундай ҳуқуқ берилиши мумкин бўлмаган объектлар ва ерлар ҳисобланади», — деди Ғайрат Ҳамроев.

Ғайрат Ҳамроевнинг қўшимча маълумот беришича, хатловдан аввал вилоятдаги мавжуд ер майдонларининг атиги 6 фоизи — 171 400 гектар ер давлат рўйхатидан ўтказилган бўлса, қолган 94 фоиз ер — 2 миллион 685 минг 400 гектар ер давлат ҳисобида бўлмаган.