Давлат божхона қўмитаси, Коррупцияга қарши курашиш, Контрабандага қарши курашиш ва Божхона аудити бош бошқармаси ходимлари томонидан сохта ҳужжатлар билан импорт операцияларини амалга оширадиган шахсларнинг божхона тўловларини четлаб ўтишга бўлган уриниши аниқланди. Бу ҳақда Божхона қўмитасининг матбуот хизмати «Дарё»га маълум қилди.
Қайд этилишича, фуқаролар Д.Ш. ва Ш.Х. Хитойда ишлаб чиқарилган, сиқилган газда ҳаракатланувчи 2 та HOWO юк автомашинасини расмийлаштириш учун Фарғона вилояти божхона бошқармасида «Божхона омбори» божхона режимига расмийлаштиради.
Бироқ Ўзбекистон Президентининг 2020 йил 19 майдаги «Ҳудудларда кўп қаватли бинолар қуриш ишларини жадаллаштириш чора-тадбирлари тўғрисида»ги ПҚ-4718-сон қарорига мувофиқ дизель ёнилғисида ҳаракатланувчи юк автомашиналарини 2021 йил 1 январгача бўлган муддатда республикага импорт қилишда имтиёз қўлланилишини билиб қолган шахслар 1,8 миллиард сўмлик имтиёзни қўлга киритиш мақсадида автомашиналарни реекспорт божхона режимига расмийлаштириб, мамлакатдан қайта олиб чиқиб кетади.
Орадан 1 ой вақт ўтиб яна ўша шахслар автомашинадаги газ баллонларини ечиб, автомашинага ёнилғи бакини ўрнатиб, автомашинанинг мотор қисмини эса сиқилган газда эмас балки дизель ёнилғисида ҳаракатланишга вақтинчалик ўзгартириб қайта олиб киради. Ҳужжатлар ҳам шу йўсинда сохталаштирилади.
Қонунбузарлар жиноий қилмишини яшириш мақсадида автомашиналарнинг сохта ҳужжатларини «Тошкент-товар» ташқи иқтисодий фаолият божхона постига тақдим этади.
Расмийлаштирув жараёнида Давлат божхона қўмитасидаги махсус дастурлар ва Ситуацион марказдаги маълумотлар, шунингдек ушбу 2 та юк автомашинасининг идентификацион белгилари орқали мазкур автомашиналар илгари мамлакатдан реекспорт қилингани маълум бўлди.
Ҳозирги кунда двигатели дизель ёнилғисида эмас, аслида сиқилган газда ҳаракатланувчи умумий қиймати 2 миллиард сўмлик автомашиналар вақтинча сақловга олинди ва божхона органлари томонидан Жиноят кодексининг 182-моддасининг 2-қисми «а» банди (божхона тўғрисидаги қонун ҳужжатларини бузиш) билан жиноят иши қўзғатилди.
Шунингдек, Давлат божхона қўмитасининг тегишли таркибий тузилмалари ва Давлат хавфсизлик хизмати ходимлари билан ҳамкорликда ўтказилган тезкор тадбирлар давомида хорижда ишлаб чиқарилган машиналарни импорт қилишда сохта ҳужжатлар тайёрлаб бераётган шахслардан иборат жиноий гуруҳ қўлга олинган.
Ўтказилган тергов ҳаракатлари давомида ушбу қонунбузар шахсларнинг иш жойлари кўздан кечирилганида товарларнинг сохта йўл юк кузатув ҳужжатларини тайёрлашда фойдаланиладиган компьютер техникалари ҳамда қўшни давлат идораларига тегишли бўлган 10 дан ортиқ муҳр ва штамплар борлиги аниқланди.
Ҳозирда юқоридаги жиноий гуруҳнинг бошқа аъзоларини ҳамда ноқонуний хатти-ҳаракатларини аниқлаш ва чек қўйиш мақсадида тергов ҳаракатлари давом эттирилмоқда.
Аввалроқ Наманганда 96 млн сўмлик тамаки маҳсулотларининг ноқонуний савдосига , Тошкентда 415 млн сўмлик парфюмерия воситаларининг ноқонуний айланмасига чек қўйилгани ҳамда Тошкентдаги дорихоналарнинг бирида кучли таъсир қилувчи дори воситалари ноқонуний равишда сотилаётгани аниқлангани ҳақида хабар берилганди.
Изоҳ (0)