Сицилияда 10 ёшли қизча «блекаут» номли чидамлиликка бўлган чақириқни бажариш вақтида нафас етишмаслигидан вафот этди, деб хабар беради «Korrespondent.net».
Reuters’нинг ёзишича, челленж вақтида иштирокчиларга камарни бўйиндан ўтказиб, видео ёзиб бўлингунга қадар нафас олмаслик таклиф этилган.
«Қизчани ваннахонадан беш ёшли синглиси топиб олган бўлиб, унинг ёнида телефон ётган. Оқибатда ижтимоий тармоқнинг ёш фойдаланувчиси шифохонада вафот этган», дейилади хабарда.
Содир бўлган воқеадан сўнг Италия ҳукумати камида 15 февралга қадар ижтимоий тармоқ фойдаланувчиларининг барча текширилмаган аккаунтларини ўчиришга қарор қилган.
Ўз навбатида TikTok’нинг маълум қилишича, компания қизни челленжда иштирок этишга мажбурлаган бирор контентни топа олмаган. Шунга қарамай, ижтимоий тармоқ ўз жонига қасд қилишга бўлган эҳтимолий ундаш бўйича тергов ишларида ҳукуматга ёрдам беришга тайёр эканлигини билдирган.
«TikTok’нинг хавфсизлиги — биринчи навбатдаги вазифамиз, шу сабабли хавфли хатти-ҳаракатларни рағбатлантирувчи ёки тарғиб қилувчи ҳар қандай контентга рухсат бермаймиз», — дейди TikTok вакили.
Аввалроқ Тошкентда поезд устида селфи қилмоқчи бўлган 18 ёшли йигитни 27 минг волтли ток ургани тўғрисида хабар берилганди.
Изоҳ (0)