Microsoft асосчиси Билл Гейтс коронавирусга қарши эмланди. Бу ҳақда у ўзининг Twitter’даги саҳифаси орқали маълум қилди.
«Ёшинг 65 да эканлигининг яхши томонларидан бири — сенда коронавирусга қарши вакцинани олиш имконияти борлигида. Бу ҳафта биринчи дозани олдим ва ўзимни ажойиб ҳис қилмоқдаман», — дейди Гейтс.
У қайси дори воситаси билан эмланганига ойдинлик киритмаган. АҚШда Pfizer/BioNTech ҳамда Moderna компаниясининг вакциналаридан фойдаланишга рухсат берилган.
Аввалроқ, 2020 йилнинг июнида Билл ва Мелинда Гейтс хайрия фонди камбағал давлатларни ҳаёт учун муҳим бўлган вакциналар билан таъминлашга беш йил давомида 1,6 миллиард доллар ажратишга ваъда берганди. Шунингдек, фонд яна 100 миллион долларни коронавирусга қарши вакцинани тарқатишга сарфлашни режалаштирган.
Эслатиб ўтамиз, АҚШда Pfizer ва BioNTech вакциналари билан аҳолини эмлаш 14 декабрь куни бошланган бўлиб, биринчи ва иккинчи доза орасидаги муддат 21 кунни ташкил этади. 15 январь ҳолатига кўра, АҚШда COVID-19’га қарши эмланганлар сони 10 миллион кишидан ошган.
Изоҳ (0)