МИБ Андижон вилоят бошқармаси Андижон шаҳар ҳокимлигидан фуқаронинг 325 миллион сўмдан ортиқ компенсация пулини ундириб берди, дея хабар берди «Дарё» мухбири.
Маълум бўлишича, фуқаролик ишлари бўйича Андижон туманлараро суди 2020 йил 9 июль куни даъвогар Андижон шаҳар Адлия бўлимининг фуқаро И.Ж. манфаатини кўзлаб берган жавобгар Андижон шаҳар ҳокимлигидан бузилган бино-иншоот учун компенсация пулини ундириш ҳақидаги даъво аризасини кўриб чиққан. Суд ишни кўриб чиқиб, жавобгар Андижон шаҳар ҳокимлигидан даъвогар И.Ж. фойдасига 325 миллион 532 минг 332 сўм ундиришни белгилаган.
Бюронинг вилоят бошқармаси ахборот хизмати раҳбари Ойиста Абдураҳмонованинг айтишича, мазкур ижро ҳужжати МИБ Андижон шаҳар бўлими иш юритувига олинган бўлиб, бўлим томонидан ундирувни ташкил этиш учун ижро варақалари ва давлат ижрочисининг ижро иши қўзғатиш ҳақидаги қарорлари шаҳар ҳокимлигига тақдим этилган бўлса-да, маҳаллий бюджетда ортиқча маблағ йўқлиги сабабли ижроси таъминланмай келинган.
Фуқаро И.Ж.нинг йўллаган мурожаатига асосан МИБ вилоят бошқармаси томонидан кўрилган чора-тадбирлар натижасида шаҳар ҳокимлигидан фуқарога 325 миллион 532 минг 332 сўм нақд пул кўринишида ундириб берилиши таъминланган.
Изоҳ (0)