Ижтимоий тармоқларда ҳаракатланаётган Spark устига чиқиб олган фуқаро видеоси тарқалди. Видео юзасидан ЙҲХББ маълумот берди.
Таъкидланишича, TikTok ижтимоий тармоғида эълон қилинган видеода иккита лавҳа монтаж қилинган бўлиб, уларнинг бирида пиёда йўлда сакраб, иккинчисида ҳаракатланаётган Spark (давлат рақами 01 530 ХGА) автомобилида пайдо бўлиб қолади. Йўл ҳаракатининг иккала иштирокчиси ҳам қоидаларни бузиб, ёшларда бу каби хатти-ҳаракатлар мумкин, деган янглиш фикр пайдо бўлишига сабаб бўлмоқда.
Маълум қилинишича, Тошкент шаҳар ИИББ ЙҲХБ ходимлари 2021 йили 18 январь куни юқоридаги автомобиль ҳайдовчиси – 25 ёшли Ойбек О.га нисбатан Маъмурий жавобгарлик тўғрисидаги кодекснинг 128-модда бўйича (транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиши) маъмурий баённома расмийлаштирилди.
Ҳозирги вақтда видеода иштирок этган пиёданинг шахси аниқланди – унга нисбатан ҳам тегишли чоралар кўрилмоқда.
Аввалроқ Бухорода таниши билан саломлашиш учун машинасини йўлнинг ўртасида тўхтатган ҳайдовчи жаримага тортилгани ҳамда Жиззахда фоторадарга тушиб қолмаслик мақсадида автомобиль рақамини «жасад бор» деб яширган ҳайдовчи аниқлангани ҳақида хабар берилганди.
