Toyota компанияси АҚШнинг Тоза ҳаво тўғрисидаги қонунини бузгани учун мамлакат бюджетига 180 миллион доллар жарима тўлайди, деб хабар беради Motor.
Нью-Йорк Жанубий округи прокурори Япониянинг Toyota корпорациясини Тоза ҳаво тўғрисидаги қонун бўйича зарарли газлар билан боғлиқ нуқсонларга оид ҳисоботлар талабини тизимли равишда бузганликда айблаган. Япон автомобиль ишлаб чиқарувчиси 2021 йил 31 мартга қадар АҚШга 180 миллион доллар жарима тўлайди. Бу Toyota ҳавога чиқадиган зарарли газлар тўғрисидаги натижаларни сохталаштирганини билдирмайди — гап бюрократик расмиятчилик ҳақида кетмоқда. Японлар буни «қоғозли» жараёнларнинг айрим қисмини бажаришдаги тушунмовчилик деб атаган.
Тоза ҳаво тўғрисидаги қонунга кўра, автомобиль ишлаб чиқарувчи нуқсонлар тўғрисидаги ҳисоботни (EDIR) бир моделнинг йил давомида камида 25 та автомобили ҳавога чиқарадиган газлар сабаб ишдан чиққан ҳолда бериши керак. Марка муаммони бартараф этгач, у ихтиёрий чақирув (VERR) бўйича ҳисобот бериши лозим. АҚШ Атроф-муҳитни қўриқлаш бошқармасининг (EPA) маълум қилишича, Toyota 2005 йилдан 2015 йилга қадар 78 та EDIR, 20 та VERR ва 200 дан ортиқ чорак ҳисоботларини тақдим этмаган.
Эслатиб ўтамиз, 2020 йилнинг октябрида Англия ва Уэльсдан Fiat-Chrysler Automobiles (FCA) дизель двигателлари ўрнатилган 500 мингга яқин автомобиль чақириб олиниши мумкинлиги тўғрисида хабар берилганди. Бунга атроф-муҳитга чиқариладиган зарарли газлар кўрсаткичи манипуляция қилинган бўлиши эҳтимоллиги сабаб бўлган.
Изоҳ (0)