Давлат солиқ қўмитаси 2021 йилда ҳам ютуқли чек ўйинлари ўтказишга қарор қилди. Бу ҳақда қўмита матбуот хизмати хабар берди.
Давлат солиқ қўмитаси 2020 йилнинг ёзида ютуқли чек ўйинлари ўтказгани тўғрисида хабар берилганди. Бундан мақсад ютуқли чек ўйинлари орқали фуқароларда харид қилинган товарлар (ишлар ёки хизматлар) учун тўлов фактини тасдиқловчи чеклар ва бошқа ҳужжатларни талаб қилиш одатини шакллантириш орқали яширин иқтисодиётга қарши курашга йўналтиришдан иборат эди.
Таъкидланишича, совриндорлар даромад солиғи тўлашдан озод этилади.
Қўмита маълумотларига кўра, 2020 йил давомида жами олтита тиражда ютуқли чек ўйинлари ўтказилиб, уларнинг ҳар бирида 120 та қимматбаҳо соврин, шу жумладан, 6 та Chevrolet Nexia-3 автомобили ўйналган.
Онлайн-НКМ ёки виртуал кассадан фойдаланишга ўтган тадбиркорлик субъектлари сони кескин ошган. Агар июль ойида бутун республика бўйлаб 26,7 минг онлайн-касса фойдаланувчиси бўлган бўлса, 2021 йил 4 январга қадар уларнинг сони 100 мингдан ошган. Ютуқли ўйинни ўтказиш даврида (2020 йил июлдан) онлайн-НКМ ёки виртуал кассалардан жами 51,5 миллион дона 14,2 триллион сўмлик чеклар чоп этилган.
Давлат солиқ қўмитасининг маълум қилишича, акция 2021 йилда ҳам давом этади. Шу муносабат билан, ДСҚнинг ижтимоий тармоқлардаги расмий саҳифалари фойдаланувчилари орасида бешта жавоб вариантидан иборат «Сиз навбатдаги тиражларда совринлар таркиби ўзгаришини хоҳлайсизми?» сўровномаси ўтказилган.
Аксарият иштирокчилар «Ҳа! Совринларни 25 тага ошириш, ҳар тиражда Chevrolet Spark автомобили ўйналиши керак» деган жавоб вариантини фаол қўллаб-қувватлаган (50 фоиздан зиёд). «Фақат Chevrolet Gentra ва пул мукофотлари ўйналиши керак» жавоб вариантини эса иштирокчиларнинг 37 фоизи маъқул кўрган.
Натижада ДСҚ сўровнома натижаларидан келиб чиқиб, совғалар рўйхатини ўзгартириш, совринларни 25 тага ошириш ва ҳар бир тиражга Chevrolet Spark қўйилиши ҳақида қарор қабул қилган.
Эслатиб ўтамиз, Ўзбекистонда тадбиркорлик субъектлари ва савдо шохобчаларида онлайн-назорат кассалари ва виртуал кассалар жорий қилинмоқда. Аҳолининг харидлар учун чек талаб қилиши ва мазкур кассалардан фойдаланишни кўпайтириш мақсадида савдо чеклари асосида ўтказиладиган чек лотереяси жорий қилинди.
Изоҳ (0)