«Масалани блоклаш ва ўчириш билан ҳал қилиб бўлмайди». Комил Алламжонов АҚШда Telegram’га қарши судга даъво киритилганига муносабат билдирди

Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси Комил Алламжонов АҚШда Telegram’га қарши судга даъво киритилганига муносабат билдирди.

АҚШнинг «Хавфсиз интернет коалицияси» (Coalition for a Safer Web) нотижорат ташкилоти судга мурожаат қилиб, Apple компаниясига Telegram мессенжерини App Store’дан ўчириб ташлаш мажбуриятини юклашни сўрагани тўғрисида хабар берилганди.

Даъво ташкилот ва унинг президенти Марк Гинсберг номидан берилган. Даъвогарлар таъкидлашича, Telegram’да антисемитизм, ирқчилик ва неонатсизм мазмунидаги контент тарқалмоқда, бу App Store’нинг дастурлар учун қоидаларига зиддир.

Шу ой бошида Капитолийда тартибсизлар келиб чиққач, Apple ва Google контент модерацияси талабга жавоб бермагани учун Parler ижтимоий тармоғини App Store ва Play Market’дан олиб ташлаган эди. Coalition for a Safer Web ушбу икки компаниядан Telegram’га нисбатан ҳам шундай чора кўришни талаб қилмоқда.

Telegram — терроризм, экстремизм, антисемитизм, порнография ва бошқа ташвиқотларга қарши фаол кураш олиб борувчи, бу каби контентни зудлик билан ўчириб ташловчи энг йирик мессенжерлардан бири. Унинг ёрдами билан фавқулодда пандемия пайтида миллионлаб одамлар зарур маълумотларни тез олиш имкониятига эга бўлдилар.

Ҳозирда Telegramдан 500 миллион киши фойдаланади ва унинг App Store ва Google Play каби улкан маркетларда блокланиши кўпчиликни ташкил қилувчи ва ушбу платформага ишонч билдирган намунали фойдаланувчиларга нисбатан ноҳақлик бўлади. Натижада улар Дуровга таъсир кўрсатмайдилар, аксинча, кўплаб тарафдорларини йўқотадилар.

Негатив контент исталган мессенжер ва ижтимоий тармоқ, жумладан, Facebook ва Twitter орқали ҳам тарқалиши мумкин. Келинг, унда уларни ҳам ёпамиз! Аммо масалани блоклаш ва ўчириш билан ҳал қилиб бўлмайди. Биргина Facebook тармоғининг Ўзбекистонда блокланганини эслайлик. Бу нафақат ўйланган натижага олиб келмади, балки вазиятни янада чуқурлаштириб юборди. Чунки, одамлар VPN’дан фойдалана бошлашди ва айнан шу орқали экстремистик контентга ҳам бемалол йўл очилди. Агар мессенжерларни бирма-бир танлаш йўли билан блокланса, қайсидир корпорациялар шунчаки рақобатчидан халос бўлишга интилаётгани аён бўлади. Бу уринишлар постлар мазмуни ёки сўз эркинлиги билан ҳеч қандай алоқаси йўқ.

Агар ушбу суд иши давлат томонидан қўзғатилганида дод-вой кўтарилар ва демократия бўғиляпти деган шиорлар илгари сурилар эди. Аммо буни қандайдир хусусий корхоналар амалга ошираётгани демократия принципларининг синиши ва уни қулай форматга мослашаётганини кўрсатади. Бундан эса ИТ-технологиялар соҳасидаги гигант-компаниялар сўз эркинлиги устидан монополияни қўлга киритгани ва ўз қоидаларини киритиш орқали миллионлаб фойдаланувчиларни очиқчасига ўзига ва ўз хоҳишига бўйсундиришга ҳаракат қилаётгани келиб чиқади.

Комил Алламжонов, Миллий масс-медиани қўллаб-қувватлаш ва ривожлантириш жамоат фонди Васийлик кенгаши раиси