Qashqadaryoda Damas haydovchilari odam tashishga ruxsat berilmagani sabab 150 nafar kishi ishsiz qolganini aytdi. Transport boshqarmasi mas’uli bunga izoh berdi

Qashqadaryo viloyatining Koson tumanida yashovchi Damas haydovchilari ularga odam tashishga ruxsat berilmayotgani sabab 150 nafar haydovchi ishsiz qolganini aytib, shikoyat qildi. Mazkur savolga javob bergan viloyat Transport boshqarmasi boshlig‘i Narzulla Namozov Damas’chilar faoliyatini tartibga soluvchi uyushmalar ish o‘rni yaratmagani uchun ularning faoliyatidan voz kechilayotganini bildirdi.

Bu haqda xabar bergan “Daryo” muxbirining yozishicha, ishsiz qolayotgan haydovchilar viloyat Transport boshqarmasi tomonidan 2021-yil 16-yanvar kuni tashkil etilgan press-turda qatnashayotgan jurnalist va blogerlarga shikoyat qilib, yordam so‘ragan.

“2007-yildan beri Damas’da odam tashish bilan shug‘ullanib kelaman. 2020-yil karantin sabab Damas’da odam tashish taqiqalandi. Va karantin davrida umuman ishlay olmadik. Holbuki, bizning qonuniy litsenziyamiz bor va hali muddati tugamagan. Shunga qaramasdan ayni kunga kelib ham bizning faoliyat yuritishimizga ruxsat berilmayapti. Ammo avtobuslar bemalol odam tashimoqda. Biz ham oila boquvchisimiz. Kontrakt asosida o‘qiyotgan farzandlarimiz bor. Ularni ham o‘ylashimiz kerak”, — deydi haydovchi Rustam Nurboboyev.

Jurnalist va blogerlar bilan suhbatlashgan Shuhrat Sultonovning ma’lumot berishicha, Damas’lar faoliyatiga ruxsat berilmagani sabab tumanda 150 nafar haydovchi ishsiz qolgan.

“Karantin deb sabab keltirishsa, nima uchun 30 nafar yo‘lovchi tashuvchi avtobuslar faoliyatiga ruxsat bor-u, 6 nafar yo‘lovchi tashuvchi Damas’larga ishlash mumkin emas”, — deydi haydovchi Shuhrat Sultonov.

Haydovchilarning mazkur e’tirozini tinglagan viloyat Transport boshqarmasi boshlig‘i Narzulla Namozov Damas’lar faoliyatini tartibga soluvchi uyushmalar qonuniy tarzda birorta ham ish o‘rni yaratmaganini aytib, shu bois ham uyushmalar nazoratidagi Damas’lar faoliyatidan voz kechilayotganini, ularning o‘rniga avtobuslar tanlanayotganini bildirdi.

“Koson tumanining o‘ziga 30-40 ta avtobus olib kelinadi. Marhamat oling va ishlang. Bitta avtobusga to‘rt nafar haydovchi olinadi. Haydovchilar ishsiz qolmaydi. Damas’lar faoliyati bo‘ldi endi. Damas o‘zini o‘zi band qilish bo‘ldi. Ish o‘rni yaratilmagan. Xohlagan ‘taksopark’ni ko‘ring, birorta ish o‘rni yo‘q”, — dedi Narzulla Namozov.

Haydovchilar va boshqarma boshlig‘i o‘rtasidagi suhbatdan ma’lum bo‘lishicha, Damas’chilar faoliyati davomida a’zoligidagi uyushmaga oyiga 350 ming so‘m pul to‘lagan. Ammo oylik maosh olmagan. Uyushmaga to‘lagan 350 ming so‘m pulidan tashqari topgan puli o‘ziga qolgan.

Eslatib o‘tamiz, koronavirus tarqalishining oldini olish maqsadida 2020-yil 22-martdan Toshkentda jamoat transportlariga qo‘yilgan vaqtinchalik taqiq 2020-yil 23-martdan boshlab Qashqadaryoda ham joriy qilingandi va Damas’lar faoliyatiga chek qo‘yilgandi. Shundan beri viloyatda Damas’da odam tashishga ruxsat berilmadi.